ශ්‍රී බුද්ධ වර්ෂ 2563 ක් වූ නිකිණි අමාවක පෝය දින රාජ්‍ය වර්ෂ 2019 අගෝස්තු 30 වනදා සිකුරාදා

මව්පිය සෙනෙහසක මහිමය

දරුවන් කෙරෙහි මව්පියන් තුළ ඇති සෙනෙහස අනන්ත ය. අප්‍රමාණ ය. අප තිලෝගුරු බුදු පියාණන් වහන්සේ විවිධ සූත්‍රානු සාරයෙන් ඒ පිළිබඳ විවරණය කොට ඇත. උන්වහන්සේ මව්පියනට දිය යුතු උසස් ම ගෞරවය , සම්මානය ලබා දුන්හ. “බ්‍රහ්මාති මාතා පිතරෝ” එයට හේතුව මව්පියන් ළඟ මහා බ්‍රහ්මයා සතු ගුණ හතරක් තිබීම ය. එනම් මෙත්තා, කරුණා, මුදිතා,උපෙක්ඛා නම් වේ. එම ගුණ ධර්ම පෙරදැරිව සෑම මව්පිය කෙනෙක් ම තම දරුවන් දෙස බලනු ඇත. සමාජයේ වෙනත් කිසිදු කෙනෙකුට එවැනි පදවියක් පිරිනමා නැත. මවක් සිය දරුවා දසමසක් කුසෙහි හොවා, මෙලොවට බිහිකොට, තම රුධිර ධාතුව කිරිකොට දරුවාට පොවා දරුවා ඇහැක් ලෙසින් ආරක්ෂා කරනු ඇත. පියෙක් උදේ හවා දෑත දෙපය කරගැට එනතුරු මහන්සි වී දාඩිය බිංදු දහස් ගණන් පොළවට වගුරා දරුවන් ලොකුමහත් කරන්නට, ඔවුන්ට අධ්‍යාපනය ලබා දෙන්නට, ඔවුන්ගේ ලෝකය ගොඩ නගන්නට වෙහෙසෙනු ඇත. “ලෝකයේ ලස්සන දේ් බිහි වන්නේ මවගේ කිරිවලින් හා හිරුගේ රශ්මියෙන් බව “මැක්සිම් ගෝර්කි නම් පඬිවරයා පවසා ඇත. ඇත්තෙන් ම දූ දරුවන්ගේ ලෝකය හදන්නේ, ලස්සන කරන්නේ, ඒ ලෝකයට ආලෝකය ලබා දෙන්නේ මව්පියන් යැයි කීම අතිශයෝක්තියක් නොවේ. එය සර්ව සාධාරණ චින්තනයකි.

නිකිණි අමාවක පෝය

නිකිණි අමාවක පෝය අගෝස්තු 29 වනදා බ්‍රහස්පතින්දා අපර භාග 07.55 ට ලබයි. 30 වනදා , සිකුරාදා අපරභාග 04.07 දක්වා පෝය පවතී. සිල් සමාදන්වීම අගෝස්තු 30 වනදා සිකුරාදා ය.

මීළඟ පෝය සැප්තැම්බර්
06 වන දා සිකුරාදා