ලේක්හවුස් නිර්මාතෘ ඩී.ආර්. විජයවර්ධන ශ්‍රීමතාණන්ගේ
138 වැනි ජන්ම දින සමරු පුණ්‍යෝත්සවයෙන් ...
තමන් උපන් දේශය, ආගම, ජාතිය වෙනුවෙන් විශාල කැප කිරීම් කළ ඩී.ආර්. විජයවර්ධන
ශ්‍රීමතාණන් නිහඬ මහා යුග පුරුෂයකු බව කොටුව ශ්‍රී සම්බුද්ධාලෝක විහාරාධිපති, බෞද්ධ
හා පාලි විශ්වවිද්‍යාලයේ හිටපු උපකුලපති, දක්ෂිණ ලංකාවේ උප ප්‍රධාන සංඝනායක
ජ්‍යෙෂ්ඨ මහාචාර්ය ඉත්තදෙමලියේ ඉන්දසර හිමියෝ පැවසූහ.
උන්වහන්සේ එසේ අදහස් දැක්වූයේ ලංකාවේ සීමාසහිත එක්සත් ප්රවෘත්ති පත්‍ර සමාගමේ
(ලේක්හවුස් ආයතනයේ) නිර්මාතෘ ඩී.ආර්.විජයවර්ධන ශ්‍රීමතාණන්ගේ 138වැනි ජන්ම දින
සංවත්සරය නිමිත්තෙන් පසුගිය 21 රාත්‍රියේ පැවැත් වූ සර්වරාත්‍රික පරිත්‍රාණ ධර්ම
දේශනාව ආරම්භක අවස්ථාවට සහභාගි වෙමිනි.
කොළඹ කොටුව ශ්‍රී සම්බුද්ධාලෝක විහාරස්ථානයේ සිට සධාතුක කරඬුව, පිරුවානා පොත්
වහන්සේ සහ මහා සංඝරත්නය ලේක්හවුස් ආයතනයේ සභාපති මහාචාර්ය හරේන්ද්‍ර කාරියවසම්
මහතා, අධ්‍යක්ෂ මණ්ඩල සාමාජිකයන්, ලේක්හවුස් ආයතනයේ ප්‍රකාශනවල කර්තෘවරුන් ඇතුළු
සේවක සේවිකාවන් විසින් දර්ශනීය පෙරහරකින් ආයතනය වෙත වැඩම කරවනු ලැබීය.
ආයතනයේ දොරටුව අබියස දී සභාපතිවරයා සධාතුක කරඬුව ප්‍රවාහන, මහාමාර්ග සහ ජනමාධ්‍ය
ඇමැති ආචාර්ය බන්දුල ගුණවර්ධන මහතා වෙත ලබා දුන් අතර, ඇමැතිවරයා විසින් ලේක්හවුස්
මන්දිරයේ ඉදිකර තිබූ දර්ශනීය පිරිත් මණ්ඩපයේ සධාතුක කරඬුව තැන්පත් කරන ලදී. ඉන්
අනතුරුව දැහැත්වට්ටිය පූජා කර මහා සංඝරත්නයට පිරිතට ආරාධනා කිරීම ලේක්හවුස්
සභාපතිවරයා අතින් සිදුවිය.
පසුදින (22) දහවල් 25 නමක් විෂයයෙහි මහා සංඝගත දක්ෂිණාවක් ලේක්හවුස් මන්දිරයේ දී
පැවැත්විණි. එහිදී ද ඩී.ආර්.විජයවර්ධන ශ්‍රීමතාණන්ගේ ජීවිතය පිළිබඳ අවබෝධය තිබෙන,
එතුමාගේ සේවය පිළිබඳ අවබෝධය තිබෙන ලේක්හවුස් ආයතනයේ සභාපතිවරයා, අධ්‍යක්ෂ මණ්ඩල
සාමාජික සාමාජිකාවන් මෙන් ම ආයතනයේ සේවක පිරිස වාර්ෂික ව ඉතා ගෞරවයෙන් යුක්ත ව මෙම
මහා පින්කම සිදු කරන බව ද මහා සංඝරත්නය විසින් පෙන්වා දෙනු ලැබූහ.
මෙම පින්කම් මාලාව කොටුව ශ්‍රී සම්බුද්ධාලෝක මහා විහාරාධිපති ජ්‍යෙෂ්ඨ මහාචාර්ය
ඉත්තදෙමලියේ ඉන්දසර නායක හිමියන්ගේ සහ හුණුපිටිය ගංගාරාම විහාරාධිකාරී ආචාර්ය
කිරින්දේ අස්සජි හිමියන්ගේ අනුශාසනා පරිදි ලේක්හවුස් ආයතනයේ අනුග්‍රහයෙන් සහ
ලේක්හවුස් බෞද්ධ සංගමයේ මෙහෙයවීමෙන් සිදුකරන ලදී.
ඡායාරූප -
චින්තක කුමාරසිංහ, රුක්මාල් ගමගේ , රංජිත් අසංක
දීපා පෙරේරා |
අව
අටවක
අමාවක
පුර
අටවක
පසළොස්වක
