මරණ තුනක්

එක් වැද්දෙක් දුනු හී රැගෙන වනයට ගොස් සද්දන්ත ඌරකුට හීයෙන් විද්දා. හී පහර කමින් ඌරා වැද්දාගේ ඇඟට පැන වැද්දා විනාශ කළා. ඒ සමඟම හී පහර වැදුණු ඌරා ද මැරී එතැනම වැටුණා. අධික බඩගින්නෙන් යුත් හිවලකු මෙතැනට ඇවිත් ගොදුරු දෙක වහා කා නොදමා මුලින්ම දුන්නෙහි හම්පට කා දැමීමට පටන් ගත්තා.

මෙසේ මෝඩ, ලෝභකමමින් මැඩුණු හිවලා හම්පට කන අතර, දුන්නෙහි බැම්ම සිඳී දුණු ගස සිවලාගේ හිස පසාරු කොට සිවලාට මරු කැඳෙව්වා. සිවලා එතැන මැරී වැටුණේ මළ කඳන් දෙකට තව එකක් එකතු කරමිනි.

කෝ නු හාසෝ කිමානන්දෝ
නිච්චං පජ්ජලිතේ සති
අන්ධකාරේන ඕනද්ධා
පදීපං න ගවෙස්සථ

මේ ජීවිතය ආශාවෙන්, තරහින්, මෝඩකමින්, වයසට යෑමෙන්, රෝගවලින්, මරණයෙන්, ශෝකයෙන්, වැළපීමෙන්, කායික දුකින්, මානසික දුකින්, සුසුම් හෙළීමෙන් හැම තිස්සේම ගිනි ඇවිලෙද්දී මොන හිනා ද? මොන සතුටක් ද? අනවබෝධය නැමති ඝන අඳුරේ ගිලී සිටින ඔබ පහනක් නො සොයන්නේ ඇයි?

උපදේශය - ලෝභකමත් මෝඩකමත් එකට එක් වූ තැන කළ යුතු නොකළ යුතු දෑ නොහඳුනයි.

සියඹලාගොඩ ධම්මින්ද හිමි