උත්තම නාහිමි පා යුග වැඳුමට අවසර

පතළ මහා වියතකු සේ වැඩසිටි දේසේ
විසුල මහා මෙහෙවර නිමකොට හෙළ දීපේ
කුසලධම්ම නාහිමි සඳ වැලමිටියාවේ
නිසල වූහ සැඟවුණු සේ සඳ අඹරෝරේ

මහ පිරිවෙන්පති පෑලියගොඩ විදුලකරේ
කුලපති සේ වැඩසිටි කැලණිය සරසවියේ
නිලතල කොතෙකුත් ලැබූණි ද සිල්වත් දිවියේ
මහ මෙර සේ නොසැලුණි! අස්තිර ජීවිතයේ

සදහම් මුතු වරුෂාවෙන් දියතම තෙත් කළ
සිත්තම් කළ රූ වන් දුටු දුටු නෙත් සනහන
පින්දම් කෙරුමට කාටත් මංපෙත් පෑදුව
උත්තම නාහිමි පායුග වැඳුමට අවසර

රජ මැඳුරට සේ පොල්අතු පැලට ද වැඩියේ
නිහතමානි ගුණය ම නොවැ ඉන් ඔප දැමුවේ
අවැසි ම කාලය අබියස නැවතුම දිවියේ
යළි පුරවනු බැරි හිඩැසකි හිම්, හිමි කෙරුවේ

සිසු හෙළ සඟ පරපුරකට මංපෙත් පාදා
ඔසු දම් පැන් පෙවූ සමිඳු පෙරමඟ විමසා
පසු කළ කාලයම අපිස් ගුණ දම් වඩවා
සඳු මෙන් සසුනඹර දිලුන හිමි සැඟවූවා

ඩබ්ලිව්. කේ. සරත් විමලසිරි