ශ්‍රී බුද්ධ වර්ෂ 2563 ක් වූ නිකිණි පුර අටවක පෝය දින රාජ්‍ය වර්ෂ 2019 අගෝස්තු 07 වනදා බදාදා

සෙංකඩගල ඇසළ මහා පෙරහර මංගල්‍යය

සිරිසර සිරිලක කන්ද උඩරට සෙංකඩගල පුරවරය තේජෝ බල පරාක්‍රමයෙන් මෙන් ම, අසිරිමත් විචිත්‍ර ලීලාවෙන් ජනමන ප්‍රබෝධමත් කරන ශ්‍රී දළදා මන්දිරයත්, ශ්‍රී නාථ, ශ්‍රී විෂ්ණු, කතරගම කඳ සුරිඳු, පත්තිනි යන සිව් දේවාලත්, ඇසළ පෙරහර සමයේ දෙස් විදෙස් දසලක්ෂ සංඛ්‍යාත ජනතාවගේ චිත්ත සන්තාන දර්ශන මාත්‍රයෙන් ම ශ්‍රද්ධා භක්තියෙන් පිරී ඉතිරී යන්නේ ය. මෙම පෙරහර මංගල්‍ය සම්බන්ධ ව ප්‍රධාන කාර්යයන් අතර, කප් සිටුවීම, ඇතුළත පූජා, කුඹල් පෙරහර, රන්දෝලි පෙරහර, දිය කැපීම, දවල් පෙරහර, රජ දැක්ම, වලිය කුන් නැටීම හා ශාන්තිය වේ. මඟුල් කප සිටුවීම සුබ නැකතින් සිදුවන අතර, දේව පූජාවක් වශයෙන් පෙරහර බාධාවක් නැතිව ජනතාවට ශාන්තිය ලබාදීම සඳහා සාර්ථකව කරගෙන යාමට දේව වරමක් අයැදීම එහි පරමාර්ථය යි.

නිකිණිපුර අටවක පෝය

නිකිණිපුර අටවක පෝය අගෝස්තු 07 වනදා බදාදා පූර්ව භාග 11.40 ට ලබයි. 08 වනදා බ්‍රහස්පතින්දා පූර්ව භාග 10.30 දක්වා පෝය පවතී. සිල් සමාදන්වීම අගෝස්තු 07 වනදා බදාදා ය.

මීළඟ පෝය අගෝස්තු 14 වනදා බදාදා ය.