දුරුතු පොහොය වර්ණනාව

එළැඹෙන නව වසර පිළිබඳව සිත් මල් යායයි
එහි ඇති සිරි බලා ගන්න අද පුර හඳ පායයි
මේ පින්බර සිරිලක යනු සදහම් මිගදායයි
අවුරුද්දේ පළමු පෝය දිනය දුරුතු පෝයයි

තෙරුවන් සරණයි දූ දරු වැඩිහිටි හැම දෙනට
නැවත වරක් ගරු බුහුමන් කරනෙමි තෙරුවනට
මිනිසත් බව අප ලැබුවේ සසරෙහි කළ පිනට
දුරුතු පෝය පිළිබඳ තොරතුරු ගමු දෙසවනට

බුදුහිමි ලක්දිවට වැඩිය පළමු දිනය අදයි
යක්ෂ ගෝත්‍රිකයන් දමනය කළ එක හොඳයි
සුමන සමන් දෙවියොත් බණ අහපු දිනය එදයි
මහියංගන බිම වටින්නෙ මේ තොරතුරු මැදයි

සුමන සමන් දෙවියන්ගේ ඉල්ලීමෙන් එදා
බුදුහිමිගේ කේශ ධාතු දුන්නලු සෙත සදා
තුන්බෑ ජටිලයන්ට දම් රසය දුනිය බෙදා
මේවා වූ අද දින පින් කර ගමු මල් පුදා

සකසා දෙන අරණක් පිළිගැනුම වැරැදි නැත කියා
බුදුහිමි සඟරුවන ඇමතුවා ලොව්තුරු ගුණ තියා
කැලණියෙ පළමුවැනි පෙරහර, ඇරඹුණි දම් රස සොයා
සමුගමි මේ හැම සිහිකර වැඳ වැඳ සම්බුදු පියා

බෙලිඔය සිරි වජිර හිමි
සිරිමහ මිහිඳු පිරිවෙන
වාද්දුව