ශ්‍රී බුද්ධ වර්ෂ 2563 ක් වූ පොසොන් අමාවක පෝය දින රාජ්‍ය වර්ෂ 2019 ජූලි 02 වනදා අඟහරුවාදා

ශ්‍රී ලංකා අමරපුර මහා නිකායේ අමරපුර අරියවංශ සද්ධම්මයුත්තික පාර්ශ්වයේ 42 වන උපසම්පදා මහෝත්සවය ජනාධිපති මෛත්‍රීපාල සිරිසේන මහතාගේ සහභාගිත්වයෙන් පසුගියදා (21) ගල්ලෑල්ල පුලතිසි විද්‍යාපීඨයේ දී පැවැත්විණි. එහිදී විද්‍යාපීඨයේ ඉදිකෙරෙමින් පවතින භික්ෂු නේවාසිකාගාරය ජනාධිපති මෛත්‍රීපාල සිරිසේන මහතාගේ නිරීක්ෂණයට ලක් වූ පසුව මනම්පිටිය පාලම අසල පිහිටි පුලතිසිපුර මහා වාලුකා නදීතෙර උදකුක්ඛේප සීමා මාලකය වෙත පැමිණි ජනාධිපති මෛත්‍රීපාල සිරිසේන මහතා පුෂ්පෝපහාර දැක්වීමට පෙර සධාතුක කරඬුව තැන්පත් කළ අයුරු. එම අවස්ථාවට අමරපුර අරියවංශ සද්ධම්මයුත්තික පාර්ශ්වයේ මහා නායක එගොඩමුල්ලේ අමරමෝලි මහා නායක ස්වාමීන් වහන්සේ, ආචාර්ය වල්පොල විමලඥාන අනුනායක ස්වාමීන් වහන්සේ, ලේඛකාධිකාරී කදුරුවෙල ධම්මපාල නායක ස්වාමීන් වහන්සේ ප්‍රමුඛ මහා සංඝරත්නය ද පොළොන්නරුව නගරාධිපති චානක සිදත් රණසිංහ, දිසාපති පණ්ඩුක අබේවර්ධන යන මහත්වරුන් ඇතුළු ගිහි පැවිදි පිරිසක් එක්ව සිටියහ. ඡායාරූප සුදත් මලවීර

උඩරට අමරපුර මහා නිකායේ උපසම්පදා විනය කර්ම පුණ්‍යෙීත්සවය ගන්නෝරුවදී

උඩරට අමරපුර මහා නිකායේ වාර්ෂික උපසම්පදා විනය කර්මය ජූලි 05 සහ 06 යන දිනයන්හි උඩරට අමරපුර මහා නිකායේ මහානායක මහෝපාධ්‍යාය ශාස්ත්‍රපති නුවරඑළියේ චන්දජෝති මහා නාහිමියන්, අනුනායක මහෝපාධ්‍යාය ශාස්ත්‍රපති නියංගොඩ සමිද්ධි මංගල නාහිමියන්, අධිකරණ සංඝනායක අනුරාධපුර භික්ෂු විශ්වවිද්‍යාලයේ මහාචාර්ය වරදිවෙල විජයසුමන යන නාහිමිවරුන් ප්‍රධාන ශාසන ජෝතිකාකාරක මහා සංඝ සභාවේ සහභාගීත්වයෙන් මහනුවර වරාතැන්න මහවැලි නදී සිරිමහ බෝධි උදකුක්ඛේප සීමාමාලකයේ දී පැවැත්වේ.

පොසොන් අමාවක පෝය

පොසොන් අමාවක පෝය ජූලි 02 වන දා අඟහරුවාදා පූර්ව භාග 03.05 ට ලබයි. 03 වන දා බදාදා පූර්ව භාග 00.46 දක්වා පෝය පවතී. සිල් සමාදන්වීම ජූලි 02 වන දා අඟහරුවාදාය.

මීළඟ පෝය ජූලි 09 වන දා අඟහරුවාදාය