හැම දෙන රැස්වුණා අම්බස්තලාවට

පොසොන් පෝය දා පෙර සිරිලංකාවේ
එදා රජුන් මිගසෙන් පසු පස දිව්වේ
හුදු සතුටමයි මහ නිරිඳුන් ඉන් සෙව්වේ
සැණකෙළි සමරන්න මුව කැළ දිවි නැසුවේ

තිස්ස රජුන් හා සෙන් මිස්සක අරණේ
සැණකෙළි සිනා සයුරේ මොනවට ගිලුණේ
අසරණ මුව කැළගෙ ජීවිතයයි නැසුණේ
අනුබුදු බණෙනි සිරිලක දන මන දැමුණේ

දුහු හි විසිවුණා මහ ගන කැලෑවට
නැණ මල් පෑදුණා සම්බුදු බණ වෙතට
රජු පෙරටුව තබාගෙන තෙරුවන් පුදට
හැම දෙන රැස්වුණා අම්බස්තලාවට

සිරිමුවඟින් නැඟුණු සදහම් අමිල මිණී
මිහිඳු සමිඳු දෙසුවේ හද දයාවෙනි
පස් පව් නතර වුණි ධර්මය පතළ වුණි
මුළු ලෝකයේ සිරිලක දම්දීපේ වුණි

සදහම් නිසා ජන හදවත නිති හැදුණා
බුදු බණ පද නිබඳ ජන සිත තුළ රැඳුණා
ඉසි කෝ මාන උල්කටු බල ඉන් සිඳුණා
දෙව්ලෝ සිරිය සිරිලක අප හට දැනුණා

යහගුණ කියාදී මිනිසත් දම් පෙව්ව
දැයකට මඟ කිව්ව තුඟු මිස්සක පව්ව
හෙළිකොට නැවත අනුකම්පාවෙන් යුතුව
සදහම් දියෙන් ජනහද සනසනු මැනව

උතුම් මිනිස්දම් සිරිලක වල් වැදිලා
සමිඳුන් කියා දුන් බණ අමතක වීලා
පස්පව් නිසා සුන්දර රට වැනසීලා
ලක්විල සුදිලේවා සදහම් මල් පිපිලා

උදම්මිට ජාඇල
උත්තමාරාම පුරාණ විහාරයේ
මොරටුවේ ආනන්ද හිමි