කොළොම්පුර බොදු පුනරුදයට කැපවන
ගංගාරාමයේ
පොඩි හාමුදුරුවෝ
 කොළඹ හුණුපිටිය ගංගාරාමාධිපති, ආචාර්ය ගල්බොඩ ඤාණිස්සර නාහිමිපාණන් වහන්සේගේ ජන්ම
දිනය දෙසැම්බර් 14 වැනි දිනට යෙදී තිබුණි.
වර්ෂ 1943 දෙසැම්බර් 14 වැනි දින මාතර දිස්ත්‍රික්කයේ ගලබඩ ග්‍රාමයේ උපත ලද
නාහිමිපාණන් වහන්සේ අතිපූජ්‍ය හික්කඩුවේ ශ්‍රී සුමංගල නාහිමියන්ගේ අග්‍රශිෂ්‍ය වූ
දෙවුන්දර ජිනරතන නාහිමියන්ගේ ශිෂ්‍ය වූ දෙවුන්දර වාචිස්සර නාහිමියන්ගේ සහ දෙවුන්දර
රතනජෝති නාහිමියන්ගේ ශිෂ්‍යවරයකු වශයෙන් පැවිදිබිමට පත් වූහ. පාරිවේණික අධ්‍යාපන
කටයුතු නිමවා විද්‍යොදය විශ්වවිද්‍යාලයෙන් ශාස්ත්‍රවේදී උපාධිය ලබා ගත් නාහිමිපාණන්
වහන්සේ ගංගාරාම විහාරය කේන්ද්‍ර කොට ගනිමින් කොළොම්පුර බොදු පුනරුදයට කැප වූහ.
නාහිමියන් කුඩා කල ගුරු දේවයන් වහන්සේගේ දෑස් නොපෙනී යාම නිසා විහාරස්ථානයෙහි
කටයුතුවල නායකත්වය ගැනීමට ඤාණිස්සර හිමියන් හට සිදු වූ අතර මේ නිසා දායකකාරකාදීන්
අතර පොඩි හාමුදුරුවෝ යන නමින් ජනප්‍රියත්වයට පත් වූහ.
හුණුපිටිය ගංගාරාම විහාරස්ථානය සකලාංග පරිපූර්ණ විහාරස්ථානයක් බවට පත් කොට දෙස්
විදෙස් බෞද්ධ අබෞද්ධ සැමගේ වන්දනාවට ලක් වන පුදබිමක් බවට පරිවර්තනය කළහ. බේරේ වැව
මධ්‍යයේ පිහිටි පැරැණි සීමාමාලකය නවීකරණය කිරීමට නාහිමිපාණන් වහන්සේ පුරෝගාමී වූහ.
මෙරට බලයට පත් වන සෑම රාජ්‍ය නායකයකුහට ම හිතෛෂීවන්ත ව රාජ්‍ය පාලනය පිණිස
නාහිමිපාණන් වහන්සේ අනුශාසනා ලබා දෙති. ජිනරතන කාර්මික විද්‍යාලය ආරම්භ කොට රට පුරා
එහි ශාඛා පිහිටුවා ලක්ෂ සංඛ්‍යාත දරු පිරිසකට වෘත්තීය පුහුණුව ලබා දී රැකියා සඳහා
යොමු කිරීම සුවිශේෂී කර්තව්‍යයකි. ගංගාරාමස්ථ ශ්‍රී ඥානේශ්වර පිරුවන ආරම්භ කොට දිගු
කලක් පවත්වා ගෙන යාමට නාහිමිපාණන් වහන්සේ විසින් මූලිකත්වය ගන්නා ලදහ.
වෙසක් පුරපසළොස්වක පොහොය නිමිත්තෙන් බේරේ වැව ආශ්‍රිත වෙසක් කලාප ආරම්භ කිරීමේ
ගෞරවය ද නාහිමියන් වෙත හිමි වෙයි. අගනුවර බොදු පෙරහර සංස්කෘතියට නව ආරක් එක් කරමින්
ගංගාරාම නවම් පෙරහර ආරම්භ කළහ.
තමා හමුවට පැමිණි කවර තරාතිරමක අයකු හට වුවත් සමානාත්මතාවයෙන් සංග්‍රහ කිරීමත්,
රාජ්‍ය නායකයා හට වුවත් කිවයුත්ත නොවළහා කීමටත් නාහිමිපාණන් වහන්සේ පසුබට නොවෙති.
නාහිමිපාණන් වහන්සේ හට නිදුක් නිරෝගී සුව චිර ජීවනය ප්‍රාර්ථනා කොට සිටිමු.
දිමුතු පුන්සර කොළඹගේ |
පසළොස්වක
අව
අටවක
අමාවක
පුර
අටවක
