මරණෙට මා බිය නොවනා

මහ ලොකු දේපොළ නොවනා
එනමුත් නැත සිත ලොබිනා
මන දොළ සරලව පිරෙනා
මරණෙට මා බිය නොවනා

සඟුනට දන් පැන් පිදුණා
මව් පිය යුතුකම් කෙරුණා
දූ දරුවන් යහ ගුණෙනා
මරණෙට මා බිය නොවනා

නැති බැරි අය හට බෙදුණා
සතුනට කරුණා පිදුණා
ඉසි කෝ මද මන් හැලුණා
මරණෙට මා බිය නොවනා

මත් දිය කිසි දින නොවනා
සොරකම සිත නැත හඳුනා
නිවැරැදි කාමයෙ රැඳුණා
මරණෙට මා බිය නොවනා

බොරු බස් මට පි‍්‍රය නොවනා
හිස් වචනය නැත සොබනා
පරුෂ වදන් මොට හඳුනා
මරණෙට මා බිය නොවනා

අධ්‍යාපනවේදී, විශ්‍රාමලත් පරිවේණාචාර්ය, පී.බී. ගුණරත්න

****

වඳිමු සිරිපා පියුම්

බැතියෙන් සිත් පැහැදේ
කරුණා රැස් විහිදේ
අපේ නඩේ
මැදිකරගෙන
අපි යමුද සිරිපාදේ

කිරි කෝඩින් රෑනයි
සැමටම තුන් සරණයි
සීත ගඟුල ළඟ හිඳගෙන
සුදු පිරුවට මානයි

මේ ගෙත්තම් පානයි
මහ ගිරි දඹ මුදුනයි
ඉදිකටු පානින් පියඹන
සුදු සමනළ රෑනයි

කොවිඩ් විපත් නොමවේ
වෛරස් බිය පහවේ
සුමන සමන් දෙවි පිහිටෙන්
මේ ලක් බිම සැනසේ

ගාල්ල තෙන්කල්ලාගොඩ ශ්‍රී විමලඥාණ දහම් පාසලේ ආචාර්ය ජී. පියදාස

****

සතුට

කුස ගිනි නිවා ගෙන සතුටින් සිටීමට
හැම කෙනෙකුට ම ඇත අයිතිය විසීමට
වස විස නොයෙක් රසකාරක එකතුකොට
හදනා අහර විකිණෙනවා හතර වට

වස විස නැතිව හෙල බොජුනක් වළඳන්න
අගහිඟ නැතිව සතුටින් ජීවත්වෙන්න
මෙත් කරුණාව හැම හදකම පුරවන්න
බිය සැක නැති ලොවක් ඒවිද දැක ගන්න

ඇල්.ඩී. සිල්වා, කොත්මලේ

****

ගංගාව

ඉඩෝරයට
වියළී ඉකිගසන
ගංගාව.....
අනෝරා වැස්සකදි
නැවතත් හඬයි
දරාගත නොහැකිව
ධර්මතාවය
එයයි.......

ඒ.එච්. බුද්ධිකා සංජීවනී
මප/කොත් හැදුණුවැව මධ්‍ය මහා විද්‍යාලය, හැදුණුවැව

****

බුදුන් දකින මල් පිපුණා

ගසක් සෙවණ දුන් බව මුදු සිසිල පෙරා
ඇසක් පුරා බුදු රැස් පෙළහරක් දරා
දොසක් නොමැති ලෙස අමයුරු මියුරු පුරා
වෙසක් මල් පිපෙයි සම්බුදු ගුණ සමරා

මරු පරදවන්නට නිසි දස පෙරුම් පිපී
අරුණා ලෝකයක් ලෙස හැම නෙතම හැපී
කරුණා ගුණෙන් සපිරුණු මෙත් දියෙන් දැපී
තෙරුවන් සරණ යමු මුළු හදවතින් අපී

අන්තිම භවය මෙය වේ ලද කය දිරුව
පන් සාළිස් වසක් සත සිත නිවූ තරුව
පින් කෙත් මව මවා දුන් බවදුක් වැරුව
පුන් සඳ පවා පායන්නේ ගරු සරුව

දැල් වෙන පහන් වැට ආලෝකය පැළඳ
කල්පයකටම නොනැසෙන දහමක පැහැද
සල් මල් මැළවුණත් නිසසල බව වැළඳ
මල් සුවඳට වඩා පැතිරේ සිල් සුවඳ

දරා විදුරසුන් පරදා මරු පබල
පෙරා අමමිහිර මිසදිටු කර දුබල
සරාගික සතන් යොමුකළ මඟ නමල
විරාජිතයි දහමින් පිරි සිත් කමල

මැදුම් මඟ සොයා දුන් දම් ඇසක් සැදේ
රිදුම් සියලු දුක් නිවනා ලොවක් රැඳේ
මුදුන් අත් තබා වඳිනා රුවක් ඇඳේ
බුදුන් දකින මල් පිපුණා වෙසක් සඳේ

වික්‍රමසිංහ අතපත්තු
තලවත්තේගෙදර

****

කසාවත

උපන්දා සිට තිබුණු අප්පච්චිගේ
අයිතිය ඉවත් කෙරුණා
නැකත් බලලා - අකුරු බලලා
අම්ම දුන් නම ඉවත් කෙරුණා
පොදුවේ සැමටම ගමේ නාමෙන්
යළිත් උප්පත්තියක් ලැබුවා
සසුන සුරකින - පින් කෙතයි නුඹ
අපයි සරු අස්වැන්න නෙළණා

කෝටියක් සංවර ශීලය - පුංචි හිතට බර වැඩිද මන්දා
පරම්පරා හත නිවන් දක්නා සසර පුරුද්ද කියා සිතුණා
පූජනීයයි වන්දනීයයි සදා බොදු හදවතේ රැඳුණා

ගොහාගොඩ, මාලා විජේරත්න

සංස්කරණය - දීපා පෙරේරා