මිහිඳු හිමියනි

පුන්සිසි මඬල ලෙස අඹතල මුදුනෙ සිට
ඇමතූ තිස්ස හද බුදු බණ උයන කොට
දුනු ඊතල කඩා දඩයම් වදුල යට
වැන්දා පුද බිමක් කර පින්බර සිහල රට

පැහැබර පොසොන් දිනයක සඳ එළිය දිදී
හිමි දෙසු දහම සෙත් මෙත් සිත් අතර රැඳී
දඩයම් යුගය බිඳ මිතනා පවෙන් මිදී
උස් කඳු මුදුන් නැඟ බුදු සිරි පතුල වඳී

ආගමනයෙන් පසු මේ පින්බිමට මගේ
ඉදිවිය වෙහෙර දාගැබ් තරගයට වගේ
සිහලෙන් වැව් පොකුණු ජල කඳ ඉහළ නැඟේ
මට නම් පරම රමණියයි මිහිඳු යුගේ

දෙහිවල ලයනල් ප්‍රනාන්දු
කවුඩාන පාර
දෙහිවල

මට අවසරයි

අඳුරේ සිටිය ලක් වැසියන් හට පිහිට
වන්නට දඹදිවෙන් පැමිණියෙ මෙහෙට
අරහත් මිහිඳු හිමි ගුණ ගී ගයන්නට
මට අවසරයි! හිමි පා යුග වඳින්නට

ලයනල් දසනායක
නාමල් උයන, නියඳගල, පන්නිපිටිය

දහම් දීපය

තෙවන දහම් සංගීතිය නිමා වින
අනු බුදු හිමි වපුලේ නිසි බුදු වදන
තෙවලා දහම දිවයින සපුරා වැඩින
ලක්බිම ‘දහම් දිවයින’ ලෙස නම් කෙරිණ

සම්බුදු පහස තෙවරක් ලද ලක් දෙරණේ
සිව්වග පිරිස විය ශාසන රකිණේ
බුදු කල් ගෙවන තෙක් සසුන ද තිර කෙරිණේ
අනුබුදු මිහිඳු නාමය ලොව පතළ විණේ

කරුණාතිලක බණ්ඩාර වාසල
තලකිරියාව

පොසොන් දිනේ අසිරිය

පා මෙත් කුළුණු සිත යහමග යවනු සිතා
‘එව තිස්සයෙනි’ අමතා අනු බුදුහු පුතා
පා යුග වඳින සඳ රජ අත් සිරස ඔතා
සිහියට නැඟෙයි ගිරිකුල සිදු කෙරුණ කතා

විමසා රජ නුවණ අඹ පැනයකට ඇසූ
පහදා දෙමින් සවනට බුදු දහම් ඔසු
සිල්වන්තයකු කොට දඩ කෙළියකට පසූ
බොදුලක් බිමක් විය අදටත් දහම් දෙසූ

කැස්බෑවේ මුණසිංහ නිශ්ශංක
බණ්ඩාරගම ප්‍රාදේශීය සභාව

පොසොන් දිනේ අසිරිය

පා මෙත් කුළුණු සිත යහමග යවනු සිතා
‘එව තිස්සයෙනි’ අමතා අනු බුදුහු පුතා
පා යුග වඳින සඳ රජ අත් සිරස ඔතා
සිහියට නැඟෙයි ගිරිකුල සිදු කෙරුණ කතා

විමසා රජ නුවණ අඹ පැනයකට ඇසූ
පහදා දෙමින් සවනට බුදු දහම් ඔසු
සිල්වන්තයකු කොට දඩ කෙළියකට පසූ
බොදුලක් බිමක් විය අදටත් දහම් දෙසූ

කැස්බෑවේ මුණසිංහ නිශ්ශංක
බණ්ඩාරගම ප්‍රාදේශීය සභාව

පොසොන් සඳෙන් නැහැවුණු ලක් දෙරණ

ලක් වැසියා නොදුටු හා නොලබපු දහම යි
ගෙන එන්නට මිහිඳු හිමියන් කැප වූවයි
තුනුරුවනගෙ ගුණ වරුසා ඇද හැලුනයි
එතුළින් අපේ ලක් දෙරණම නිවුනයි

දිගු ඉතිහාසයක් ඇති ඒ පින්බර දිනය
සුචරිතවත් බවෙන් සිහිකර ගත යුතු ය
දන්, සිල්, භාවනා කරමින් තම දිවිය
ජය ගන්නට පතමු මේ මිනිසත් භවය

කු/නික/වාරි රතනසෙල ඓතිහාසික මහ පිරිවෙනෙහි
නියෝජ්‍ය පරිවේණාධිපති
ගලගෙදර රතනවංහ හිමි

නමදිමු මිහිඳු හිමි

සම මෙත වඩා හැම සත දුක කරන නිමී
අම මහ නිවන් මග පහදා හැඳින ගමී
එම මඟ දෙසුව හද කරුණා ගුණෙන් තෙමී
නමදිමු පොසොන් දින අනුබුදු මිහිඳු හිමී

පී. බී. ගුණරත්න
සිරි මිහිඳු දහම් පාසල, කෝරළ ඉම