වෙසක් සඳ

ලුම්බිණි සල් වනේ
සල්මලින් බර වුණේ
දෙව් බඹුන් රැස් වෙලා
රැකවරණ සැලසුණේ
බෝසතුන් මනුලොවට
වඩින බව සැල වුණේ
නිලඹරේ ලෙළ දෙමින්
වෙසක් සඳ බැබළුණේ

ඇසතු බෝරුක් සෙවණෙ
උතුම් වජිරාසනේ
මර සෙනඟ පැරදුණේ
කෙලෙස් මුල් දුරු වුණේ
ගයාවේ පින්බිමේ
බෝසතුන් බුදු වුණේ
නිලඹරේ ලෙළ දෙමින්
වෙසක් සඳ හිනැහුණේ

නිම් තෙරක් නොමැති වූ
සංසාර සාගරය
නිම කරන්නට අපට
එතෙර වෙන මඟ කියා
සාල රුක් සෙවණ යට
නිවන්මඟ කිය කියා
බුදු සමිඳු පිරිනිවී
වෙසක් සඳ බැස ගියා

- චන්දිමා ජයවර්ධන