වඳීම් බැතින් පා තඹුරූ

සාරා සැකි කප් සසරේ
දස පාරමි දම් සපුරා
දස මර සේනා පැරදූ
දෙතිස් මඟුල් ලකුණින්
සපිරි සම්බුදු සිරිපා පියුමන්
කරනෙම් බැතියෙන් පිනිපා

තෙදවත් රිවි මඬලක් සේ
සවනක් බුදු රැස් විහිදා
සතහට මහ කරුණාවෙන්
පා ගමනින් අප වෙනුවෙන්
සිය දහසක් ගවු වඩිමින්
දෙසුවේ නව ලොවුතුරු දම්

දෙව් බඹ මනු සත් වෙතිනී
පිදුම් ලැබූ දිව රැයෙහි
සීල සමාහිත නුවණින්
සව් කෙලෙසුන් මුල් සිඳලූ
මෙත් මුදිතා මහ සයුරු
වීතරාගි බුදු සමිඳූ
වඳීම් බැතින් පා තඹුරූ

ආචාර්ය
රත්නපාල වික්‍රමසිංහ