ශ්‍රී බුද්ධ වර්ෂ 2563 ක් වූ ඉල් අව අටවක පෝය දින රාජ්‍ය වර්ෂ 2019 නොවැම්බර් 19 වනදා අඟහරුවාදා

ස්වර්ණමාලී මහ සෑ රදුන් වෙත පළඳවන රන් පාදම සහිත නව චූඩා මාණික්‍යය මහජන වන්දනාවට ප්‍රදර්ශනය කෙරේ

අනුරාධපුර අසදෘශ ස්වර්ණමාලී මහා චෛත්‍ය රාජයාණන් වහන්සේ වෙත පළඳවන රන්පාදම සහිත නව චූඩා මාණික්‍යය මහජන පූජෝපහාර සඳහා ප්‍රදර්ශනය කෙරේ. ඒ අනුව කොළඹ බණ්ඩාරනායක සම්මන්ත්‍රණ ශාලාවේ දී මෙම මස 18, 19, 20 යන දිනවලදී මහජන වන්දනාවට අවස්ථාව සැලසේ. මෙම මස 21 වන දා පෙර වරුවේ කොළඹ බණ්ඩාරනායක සම්මන්ත්‍රණ ශාලාවේ සිට එම රන්පාදම සහිත නව චූඩා මාණික්‍යය කුරුණෑගල ඇත්කඳ විහාරය වෙත රිය පෙරහරකින් වැඩම කෙරේ. නැවත 22 වන දා පස් වරුවේ ඇත්කඳ විහාරයේ සිට අනුරාධපුරය බලා වැඩමවා අනතුරුව 22, 23 සහ 24 යන දිනවල දී අනුරාධපුර රුවන්වැලි සෑ පූජා භූමියේ විශේෂ පීඨිකාවක තැන්පත් කිරීමෙන් අනතුරුව මහජන වන්දනාව සඳහා අවස්ථාව සැලසේ. මෙම 25 වන දා චූඩා මාණික්‍යය සහිත රන්පාදම මහා සෑ රදුන් වෙත පැළඳවීම සිදු කෙරේ. මෙම 26 වන දා එම රන් ආලේපිත කොත් වහන්සේ නිරාවරණය කෙරේ. අතිපූජනීය ස්වර්ණමාලී චෛත්‍ය මහා රාජයාණන් වහන්සේ වෙත රන්පාදම සහිත නව චූඩා මාණික්‍යය පැළඳවීමේ මහා පූජෝපහාර වන්දනාවට අවශ්‍ය සියලු කටයුතු මේ වන විට සංවිධානය කර ඇත.

ඉල් අව අටවක පෝය

ඉල් අව අටවක පෝය නොවැම්බර් 19 වන දා අඟහරුවාදා අපර භාග 03.35 ට පෝය ලබයි. 20 වන දා බදාදා අපරභාග 01.41 දක්වා පෝය පවතී. සිල් සමාදන්වීම 19 වන දා අඟහරුවාදා ය.

මීළඟ පෝය නොවැම්බර් 26 වන දා අඟහරුවාදා ය.