ශ්‍රී බුද්ධ වර්ෂ 2563 ක් වූ බිනර අව අටවක පෝය දින රාජ්‍ය වර්ෂ 2019 සැප්තැම්බර් 22 වනදා ඉරිදා

අනගාරික ධර්මපාල තුමා

ඉතිහාසය දන්නා දරුවෙකු දහම් පාසලෙන් බිහි කරමු

අප අනගාරික ධර්මපාල තුමා කියන්නේ එතුමාගේ අතීත චරිතයට යි. නමුත් උන්වහන්සේ අපවත් වෙන්නේ සිරි දේවමිත්ත ධර්මපාල හාමුදුරුවෝ ලෙසයි. ඒ නිසා භික්ෂූන් වහන්සේලා වන අපටත්, අන් අයටත් වැඳිය හැකි, පිදිය හැකි ස්වාමීන් වහන්සේ නමක් තමයි සිරි දේවමිත්ත ධම්මපාල හාමුදුරුවෝ කියන්නේ. ඇයි අපි ධර්මපාල හාමුදුරුවෝ මතු කර ගන්නේ නැතිව ධර්මපාලතුමා මතුකර ගන්නේ. එතුමා තමයි අපේ ජාතික කාර්ය භාරයේ විශිෂ්ටත්වයේ සලකුණ බවට පත්ව තිබෙන්නේ. ජාතියේ පියා ලෙස සැලකිය හැක්කේ අනගාරික ධර්මපාල තුමා යි. ඒ නිසා අද අප ජාතියේ පියා අනුස්මරණය කරන ඒ උතුම් අනුස්මරණ අවස්ථාවටයි සහභාගි වී සිටින්නේ. රටේ සුවිශේෂි, ගෞරවයට පාත්‍ර විය යුතු පුද්ගලයන්ට තමන් ජීවත්වන කාලය තුළ නින්දා විඳීමට සිදුවීමත්, මරණයෙන් පසු ඔවුන් ජාතික වීරයන් ලෙස වීරත්වයට නම් කිරීමත් සදාකල්හි ම ශ්‍රී ලාංකීය ඉතිහාසය තුළ අප දකින දෙයක්. ඒ සදාතනික උරුමයට අනගාරික ධර්මපාල තුමාත් බඳුන් වුණා. එතුමා ජීවත් වූ කාලයේ දී ජාතිවාදී, ආගම්වාදී උන්මත්තකයෙක් ලෙස සමාජයේ ඇතැමුන් එතුමාට ගැරහුම් කළා. පසුකාලීන ව එතුමා ජාතිය, දේශය ගොඩනැඟූ මහා ශ්‍රේෂ්ඨයෙකු ලෙස නම් කරන්න ඔවුන් ම කැමැති වුණා.

බිනර අව අටවක පෝය

බිනර අව අටවක පෝය සැප්තැම්බර් 21 වන දා සෙනසුරාදා අපර භාග 08.20 ට ලබයි. 22 වන දා ඉරිදා අපර භාග 7.50 දක්වා පෝය පවතී. සිල් සමාදන්වීම සැප්තැම්බර් 22 වන දා ඉරිදා ය.

මීළඟ පෝය සැප්තැම්බර් 28 වන දා සෙනසුරාදා ය.