ශ්‍රී බුද්ධ වර්ෂ 2563 ක් වූ බිනර පුර පසළොස්වක පෝය දින රාජ්‍ය වර්ෂ 2019 සැප්තැම්බර් 13 වනදා සිකුරාදා

නිවන් සුවය හැඳින ගනිමු

බිනර පුර පසළොස්වක පොහොය දිනයට ශාසන ඉතිහාසය තුළ වඩාත් වැදගත් තැනක් හිමි වෙයි. බුද්ධ ශාසනය තුළ භික්ෂුණී සමාජය ආරම්භවීම ඊට ප්‍රමුඛ හේතුවයි. බිනර පොහෝදා මහා ප්‍රජාපතී ගෝතමී දේවිය ගේ පැවිදිවීම සිදු වූ අතර, එයම භික්ෂුණී සමාජයේ ආරම්භය විය. අද වැනි පොහොය දිනෙක ඉහත කී ශාසනික වැදගත්කම සිහිපත් කිරීම ඉතා වැදගත් වෙයි. ඒ සමඟම බුදු දහමේ මූලික ඉගැන්වීම් පිළිබඳව අවබෝධයක් ලබා ගැන්ම ද බුද්ධිමත් පියවරක් වනු ඇත. බුදු දහමේ අවසාන අපේක්ෂාව නිර්වාණාවබෝධය යි. නිවන යන ශබ්ද මාත්‍රය පවා සැදැහැති බෞද්ධයන්ගේ කන් පිනවන, සිත සනසන මිහිරි හඬෙකි. කිසියම් කුසලයක් සිදුකොට සැදැහැතියන් ප්‍රාර්ථනා කරනුයේ නිවන් සුවයයි. ඔවුන්ගේ එකම පරමාර්ථයත් එම උතුම් නිවනයි.එබැවින් අද දින නිවන පිළිබඳ හැකිතාක් දුරකට මෙනෙහි කිරීම අර්ථවත් වෑයමක් යැයි, සිතේ. තෘෂ්ණාව ‘වාන’ යනුවෙන් හැඳින් වේ. ‘නි’ යනු ‘නික්මීම’ යන අර්ථයයි. මෙම වාන සංඛ්‍යාත තෘෂ්ණාවෙන් නික්මීම ‘නිබ්බාන’ යනුවෙන් අර්ථ දැක්විය හැකි ය. මෙය නිත්‍ය දෙයක් වන හෙයින් කිසි කලෙකත් අභාවයට පත් නොවේ. එසේම නිවන සඳහා බොහෝ සත්ත්වයින් පැමිණීමෙන් එහි පූර්ණත්වයක් හෝ, නොපැමිණීමෙන් ඌණ තත්ත්වයක් හෝ ඇති නොවේ. නිවන හුදෙක් හට ගැන්මක් හෝ සටහනක් නොමැති ලෝකෝත්තර ධර්මතාවයෙකි.

බිනර පුර පසළොස්වක පෝය

බිනර පුර පසළොස්වක පෝය සැප්තැම්බර් 13 වන දා සිකුරාදා පූර්ව භාග 07.35 ට ලබයි.
14 වන දා සෙනසුරාදා පූර්වභාග 10.02 දක්වා පෝය පවතී.
සිල් සමාදන්වීම සැප්තැම්බර් 13 වන දා සිකුරාදා ය.

මීළඟ පෝය සැප්තැම්බර්
22 වන දා ඉරිදා