බොදු පුවත් (ඡායාරූප)
 

2011 වසරේදී යෙදෙන 2600 සම්බුද්ධත්ව ජයන්තිය පිළිබඳ විසිවැදෑරුම් වැඩ සැලැස්ම අග්‍රාමාත්‍ය රත්නසිරි වික්‍රමනායක මහතා විසින් මහ සඟරුවන වෙත පිරිනමන ලද අවස්ථාව. ශ්‍රී ලංකා අමරපුර මහා සංඝ සභාවේ උත්තරීතර මහානායක අග්ගමහා පණ්ඩිත දවුල්දෙන ඤාණිස්සර මහනාහිමියෝද, ශ්‍රී ලංකා රාමඤ්ඤ මහා නිකායේ මහානායක අග්ගමහා සද්ධම්ම ජෝතිකාධජ වේවැල්දෙණියේ මේධාලංකාර මහනාහිමියෝද ඡායාරූපයේ වෙති. ඡායාරූපය - සරත් වීරසිංහ

මහනුවර ශ්‍රී පුෂ්පදාන සමිතියේ ශත සංවත්සර උත්සවය පෑලියගොඩ විද්‍යාලංකාර පරිවේණාධිපති කැලණිය විශ්ව විද්‍යාලයේ කුලපති වැලමිටියාවේ කුසලධම්ම නාහිමියන් ගේ ප්‍රධානත්වයෙන් පසුගියදා පැවැත්විණි. එහිදී කුසලධම්ම නාහිමියන්ගේ ඡායාරූප ඇතුළත් තිළිණයක් සමිතියේ ලේකම් ගාමිණී සිරිසේන මහතා විසින් නාහිමියන් වෙත පිරිනැමූ අවස්ථාව. සමිතියේ සභාපති පී.ඩී.ජී. පතිරණ මහතා ද මෙහි වෙයි. කේ. බණ්ඩාරනායක

මිරිසවැටිය ළමා සමාජය මගින් සංවිධානය කළ උපහාර තිළිණ පිරිනැමීමේ උත්සවයක් පසුගියදා අනුරාධපුරයේදී පැවැත්විණි. එහිදී අටමස්ථානාධිපති ආචාර්ය පල්ලේගම සිරිනිවාස නා හිමියෝද, ස්වර්ණමාලි චෛත්‍යාරාමාධිපති පල්ලේගම හේමරතන නාහිමියෝද, මිරිසවැටිය විහාරාධිකාරී ඊතලවැටුනවැවේ ඤාණතිලක හිමියෝද උපහාර තිළිණ ලැබූහ. උතුරුමැද පළාතේ ප්‍රධාන අමාත්‍ය බර්ටි පේ‍්‍රමලාල් දිසානායක මහතා ද එම අවස්ථාවට සහභාගි වූ අතර එහිදී අටමස්ථානාධිපති පල්ලේගම සිරිනිවාස නාහිමියන් වෙත උතුරුමැද පළාත් ආණ්ඩුකාර කරුණාරත්න දිවුල්ගනේ මහතා විසින් උපහාර තිළිණය පිරිනැමූ අයුරු මෙහි දැක්වේ.
අනුරාධපුර දිසා විශේෂ වෝල්ටර් දයාරත්න