මල්වතු මහා විහාරයේ කඨින පින්කම

මහනුවර මල්වතු මහා විහාරයේ කඨින පින්කම මෙම මස 26 වන දා මල්වතු මහා විහාරයීය සංඝ රාජ ගුණානුස්මරණ සමිතිය සහ සංඝරාජ කාන්තා සමිතියේ මෙහෙයවීමෙන් පැවැත්වේ.

මල්වතු මහා විහාරයීය කාරක මහා සංඝ සභාවේ ජ්‍යෙෂ්ඨ කාරක සභික මහෝපාධ්‍ය අලුත්ගම ධම්මානන්ද නාහිමියන්ගේ අනුශාසකත්වයෙන් මෙවර සිදු කරනු ලබන්නේ හැට පස්වන කඨින පින්කම් පූජෝත්සවයයි.

කඨින පින්කම නිමිත්තෙන් කඨින චීවර තුනක් මල්වතු මහා විහාරය, මල්වතු මහනා හිමි නිල ආරාමය, පෝයමලුව විහාරය යන ස්ථාන තුනට පූජා කෙරේ.

මෙම කඨින චීවර තුන අලුයම මහනුවර ධර්මපාල මාවතේ කලුබෝවිල මහතාගේ නිවස අම්පිටිය එලිපත්කදුරේ ඩබ්ලිව්. පණ්ඩිතරත්න මහතාගේ නිවස සහ මහනුවර මහාමායා බාලිකා විදුහල සිට පෙරහරෙන් මල්වතු මහා විහාරය කරා වැඩම කිරීම සිදුකෙරේ.

මහනුවර, උඩපේරාදෙණිය, අම්පිටිය, තුම්පනේ කුළුගම්මන, හිදගල යන ග්‍රාමයන්හි දායක දායිකාවන්ගේ සහභාගීත්වයෙන් සිදු කෙරෙන කඨින චීවර පින්කම මල්වතු මහා විහාරයීය ගරුතර මහා සංඝරත්නය පණස් නමක් විෂයෙහි සපිරිකර සංඝගත දක්‍ෂිණාවක් පිරිනැමේ.

එම අවස්ථාවට මධ්‍යම පළාත් ආණ්ඩුකාර ටිකිරි කොබ්බෑකඩුව, දියවඩන නිලමේ ප්‍රදීප් නිලංග දෑල ප්‍රධාන ඇමැති, සරත් ඒතනායක යන මහත්වරු ඇතුළු නියෝජ්‍ය බෞද්ධ කටයුතු කොමසාරිස් සහ මහනුවර බෞද්ධ සමිති නියෝජිතයින් රැසක් සහභාගී වෙති.