ගල්ටැම්වත්තේ පුඤ්ඤානන්ද හිමි ප්‍රධාන අධිකරණ සංඝනායක ධුරයට

ඩී.එස් ගුණතිලක ඌව වෙල්ලස්ස විශේෂ

සියම් මහා නිකායේ අස්ගිරි පාර්ශවයේ මොනරාගල දිස්ත්‍රික්කයේ ප්‍රධාන අධිකරණ සංඝනායක ධූරයට ගල්ටැම්වත්තේ පුඤ්ඤානන්ද හිමි පත්කොට ඇත.

සියම් මහා නිකායේ අස්ගිරි පාර්ශවයේ මහා නායක ස්වාමීන් වහන්සේ ප්‍රමුඛ කාරක සංඝ සභාව මඟින් එම ධූරය පුඤ්ඤානන්ද හිමිට පිරිනමා ඇත.

1975 මාර්තු මස 04 වැනි දින බඩල්කුඹුර කඳුකර කෝරලයේ ගල්ටැම්වත්ත ගම්මානයේ දී උපත ලබා ඇති උන්වහන්සේ දොළොස් වෙනි වියේදී එවකට ඓතිහාසික යුදඟනාව රාජමහා විහාරය සහ දෙමටමල් විහාරය යන විහාරස්ථානවල විහාරාධිපති හිමි ලෙස කටයුතු කළ අපවත් වී වදාළ ගල්ටැම්වත්තේ චන්ද්‍රජෝති නාහිමියන්ගේ ශිෂ්‍යයකු ලෙස පැවිදි දිවියට එළඹ ඇත.

උන්වහන්සේ දැනට ඔක්කම්පිටිය දෙමටමල් විහාරයේ විහාරාධිපති හිමි ලෙස වැඩවාසය කරති.

නිට්ටඹුව සාරිපුත්ත විද්‍යා පීඨයේ ඩිප්ලෝමාධාරියකු වන උන්වහන්සේ මොනරාගල ජාතික පාසලේ ගුරුවරයකු ලෙස දීර්ඝ කාලයක් සේවය කර දැනට ඔක්කම්පිටිය මහා විද්‍යාලයේ නියෝජ්‍ය විදුහල්පතිවරයා ලෙස කටයුතු කරති. ප්‍රදේශයේ ආගමික,සමාජයීය සහ ආර්ථික කටයුතු නංවාලීම සඳහා විශාල සේවයක් ඉටුකරන උන්වහන්සේ දක්ෂ ධර්ම කථිකයකු ලෙස ද ප්‍රකට හිමි නමකි.