දන් දෙන අයට පරිභව කළොත්
විපාකය බරපතළයි
 දෙමැද – දැරණියගල
ශ්‍රී චිත්ත විවේකාරාමයේ
ඇටම්පොල ඤාණිස්සර හිමි
වස් කාලය එළඹෙත්ම භික්ෂූන් වහන්සේලා දොළොස් නමක් බුදුරජාණන් වහන්සේගෙන් කමටහන් ලබා
වස්කාලය ගත කිරීමට සුදුසු ස්ථානයක් සොයා ගමන් ආරම්භ කළහ. රමණීය වන පෙදෙසකට වැඩම කළ
භික්ෂූන් වහන්සේලා රාත්‍රී කාලය එහි ගත කොට පසු දින උදෑසන අසල ගමකට පිඬු සිඟා වැඩම
කළහ.
 එ ගම් වැසියෝ පේශකර්මාන්තයේ නියැළුණු හ. එගම් වැසි සැදැහැවත් ජනතාවගෙන් භික්ෂූන්
වහන්සේ වස් විසීමට ආරාධනා ලැබූහ. ඒ ගම පවුල් එකොළසකි.
ඒ අනුව වස් විසීමට ආරාධනය කළ ගම් වාසීහු එක එක නමකට උවටැන් කිරීමට ද භාර ගත්හ. ගම්
දෙටුවා දෙනමකට උපස්ථානයට පොරොන්දු විය. ජ්‍යෙෂ්ඨ පේශකාරයාගේ භාර්යාව ශ්‍රද්ධාවේ
නොපිහිටි ඇත්තියකි. මිසදිටු ය. තෙරුවනට ගරු නොකරන්නී ය. භික්ෂු සංඝයා වහන්සේට
උපස්ථාන නො කරන්නීය. පේශකාර තෙම පළමු බිරියගේ නැඟණිය තම නිවසට ගෙන්වා ගෙන සියලු දෑ
ඇයට පවරනු ලැබීය.
වස් අවසානයේ භික්ෂු සංඝයා වහන්සේට දක්ෂිණාවක් පිරි නැමීය. සිව්රු පිරිකර ද පිරි
නැමීය. එය නොරිස්සූ පළමු බිරිඳ තම ස්වාමිපුරුෂයාට දෝෂාරෝපණය කළා ය. සංඝයා වහන්සේට
ආහාරපාන දෙන ඔබට පරලොව දී ලැබෙන ආහාරපාන මළ මූත්‍ර සැරව වේවායි ද කීවා ය.
ජ්‍යෙෂ්ඨ පේශකාර තුමා දානාදී පින්කම් කොට මිස පරලොව ගොස් වින්ධ්‍යා පර්වතය අසල මහත්
වූ ආනුභාව සම්පන්න රුක් දෙවියෙක් ව ඉපදුණේ ය. ඔහුට සිතූ දෑ පහළ විය.
මසුරු වූ භාර්යාව මිය පරලොව ගොස් රුක් දෙවි වසන ස්ථානයට නුදුරුව පේ‍්‍රතියක වී
ඉපදුණා ය.
ඇය නිර්වස්ත්‍ර ය. කෘෂ ය. දුර්වර්ණ ය. සා පිපාසයෙන් පීඩිත ය. එකල රුක් දෙවියන් අසලට
මෙම පේ‍්‍රත ස්ත්‍රිය ගමන් කොට මට ආහාරපාන වස්ත්‍ර දෙවයි ඉල්ලීය. එවිට රුක් දෙවියා
විසින් ආහාරපාන හා වස්ත්‍ර ලබා දෙයි. එහෙත් ඒ ආහාර පාන මළ මුත්‍ර ලේ සැරව බවට පත්
වේ. ඉහත භවයේ ඈ කළ අකුසල කර්ම නිසා එසේ සිදුවෙයි.
එක්තරා භික්ෂුවක් රුක් දෙවියන් සමීපයට පැමිණි කල්හි මේ දැක එසේ වූයේ ඇයිදැයි
දෙවිඳුගෙන් විමසීය. රුක් දෙවියා විසින් පෙර භවයේ දී සිදුවූ පුවත භික්ෂූන් වහන්සේට
පවසන ලදී.
අනතුරුව රුක් දෙවියා විසින් “ස්වාමීනි, මේ අකුසල කර්මයෙන් මැය නිදහස් කර ගැනීමට
කිසියම් උපක්‍රමයක් ඇද්දැයි” විමසන ලදී. භික්ෂු සංඝයා වහන්සේට දක්ෂිණාවක් පිරිනමා
පින් දීමෙන් පේ‍්‍රත ආත්ම භාවයෙන් මිදීමට හැකි බව භික්ෂූන් වහන්සේ පැවසූහ.
රුක් දෙවි තෙමේ ද මහා සංඝරත්නය වෙනුවෙන් දක්ෂිණාවන් පූජා කොට පේ‍්‍රත ස්ත්‍රියට
පින් අනුමෝදන් කළේ ය. වස්ත්‍ර යුගලක් ඒ භික්ෂූන් වහන්සේගේ අතට දී බුදුරජාණන්
වහන්සේට පූජා කරන ලෙස අයැද සිටියේ ය.
පින් අනුමෝදන් වූ පේ‍්‍රත ස්ත්‍රිය දිව්‍ය ආත්ම භාවයක් ලැබුවා ය. භික්ෂූන් වහන්සේ
බුදුරජාණන් වහන්සේට වස්ත්‍ර පූජා කොට සියලු විස්තර ප්‍රකාශ කළහ. එම සිදුවීම් මුල්
කරගෙන බුදුරජාණන් වහන්සේ මේ මහා පේශකාර ප්‍රේත වස්තුව දේශනා කොට වදාළ සේක.
දන් පැන් නොදෙන, නිග්‍රහ කරන, තෙරුවන් නො අදහන, භික්ෂූන් වහන්සේට නිග්‍රහ කරන, දන්
දෙන අයට පරිභව කරන්නවුනට පරලොව දුක් විඳීමට සිදුවන ආකාරය මෙම කතා පුවතින් මනාව
පැහැදිලි වනු ඇත. |
අමාවක
පුර
අටවක
පසළොස්වක
අව
අටවක
