මෙවර ජයග්‍රාහී කවිය

පින් බිමක සුවය

පවනේ අරුමය සිතට දැනේ
සනරාමර බුදු මහිම පෙනේ
බෝ මලුවේ සුදු සුදු අරලිය මල්
බවුන් වඩන මෙත් දසුන අනේ

සෙමින් හමායන වෙහෙර බිමේ
සුගන්දයෙන් මෙත් සිතැඟි තෙමේ
නිවන් මඟ කියන් රුවන් එළිය දෙන
පහන් වැටෙන් සිත් සතන් නිමේ

පවත්වනා දම් දෙසුම් ඇසේ
සැවත් නුවර සිරි දකිම් මෙසේ
කෙලෙස් නිවාලන දහම් හඬින් අද
මහත් නිරා දුක් දොරටු වැසේ

මිරිජ්ජවිල
සිරි දන්තනාරායන

පැතුම...

වෙහෙරට ඇදෙන හේවිසි පෙරහර මැද්දේ
මලුවෙහි නැගෙන ගණ්ඨා නාදය මැද්දේ
මුවගින් නැඟෙන නෙක ගාථා හඬ මැද්දේ
බුදු හිමි සිටිය යුත්තේ හදවත මැද්දේ

තේ පැන් සිසිල් පැන් බත් දන්සල් ඇතුළේ
පන්සල් රැගෙන යන මල් වට්ටිය ඇතුළේ
රසවත් ලෙස ගැයෙන කවි බණ තැටි ඇතුළේ
නොව, බුදු හිමි සිටිය යුත්තේ හද ඇතුළේ

රංජිත් සිසිර කුමාර සූරිය ආරච්චි

සිත ගැන

දුටු දුටු දේ ගැන ආසා කරනු එපා
දුටු දුටුවන් ගැන ආසා හිතනු එපා
හිත පෑරෙන දේවල් ගැන පතනු එපා
නිවනට යන මඟ අහුරා ගන්න එපා

පානදුර
ප්‍රේමා බොරලුගොඩ

පුදුමයක්

හැම
ක්ෂණයකම
මරණයක්
මළගමක්
නැති හැටි
පුදුමයක්
පරගම්මන
නන්ද

යහපත අගයමු

පවිටු මිසදුටු බවින්
ජීවත් වීම නොහොබී
දෙලොව ම අගතිය යි වන්නේ
සත් පුරුෂ දම් සදා අගයමු

දෙව්පහළ සුමේධ හිමි
ශ්‍රී ඤාණසීහ පිරිවෙන, පළාවෙල, රත්නපුර

කොවිඩ් ආයෙත් ඇවිල්ලා

මුව රැඳි ගස මල් උගුල්ලා
කඳුළක් අලුතින් ගෙනල්ලා
බිය කරමින් අප සියල්ලා
කෝවිඩ් ආයෙත් ඇවිල්ලා

බුදු හිමි දෙසූ බණ අහලා
ඒ මග දිගේ පිය නඟලා
සසරේ දුක් ගිනි දුරැලා
සැනසෙමු නිවනින් නිවිලා

චන්ද්‍ර වාකිස්ට
දික්වැල්ල

මහ සෑ වන්දනා

නව චූඩාමාණික්‍යය පැළඳූ
නමදිමු රන්වැලි සෑ රජිදූ
දුටුගැමුණු මහ ඒ අප නිරිඳු
කරවූවාය රන්වැලි සෑ රජිඳු

අජිත් වික්‍රමනන්ද වීරසූරිය
ඉඹුල්ගස්දෙණිය

සැකය

සැකය යන්න හදවතෙ බැදි බීජයකි
එය පැළ වුණොත් මුලු දිවියම විනාශෙකි
තේරුම් ගන්න බැරි වුවොත් පාපයකි
එය නොවැටහෙනා මිනිසා අද මෝඩයෙකි

තමා තමා යනු කවුරුද නොදන්නා
මිනිසා මිනිස්කම හරිහැටි නොදන්නා
මොළයක් තිබුණමුත් තෝරා නොගන්නා
තිරිසන් සතකු විලසට හිඳ මියෙන්නා

ශීලා ජයකොඩි තඹුත්තේගම

සංස්කරණය
ජම්මික ප්‍රබෝධනී වැලිකල