උසස් පින්කම

බුදු හිමි දෙසූ අනුව ම වස් දම් පුරන
තෙමසක් පුරා පිළිවෙත් පිරු සඟ රුවන
චීවර මාසයේ සැම වෙහෙරක බැතින
උසස් ලෙස පවත්වයි පින්කම කඨින

කඨින මහා පින්කම බලගතු එකකි
අට මහා කුසල් බලයේ එක පින්කමකි
වෙහෙරක පවත්වන්නට හැකි එක් වරකි
බොදු ජනතාවගේ හද දිනු මල් කඩකි

සී. එම් . වික්‍රමසිංහ
කැලෑගෙදර
කොටදෙනියාව

මේ වස් කාලය යි

මේ වස් කාලය යි අපි පන්සලට යමු
දන් සිල් භාවනා පින්කම්වල යෙදෙමු
උදයට බෙහෙත් කැඳ සඟ රුවනට පුදමු
මළු පෙත් මං හැමද වත් පිළිවෙත් කරමු

දහවල දානෙ අරගෙන පන්සලට යමු
කිරි පැණි අවුළුපත් හා පලතුරු ද දෙමු
සවසට ගිලන්පස ටික පූජා කරමු
පන්සිල් රැගෙන බැතියෙන් තෙරුවන් වඳීමු

දෙවිපහල සුමේධ හිමි
ශී‍්‍ර ඤාණසීහ පිරිවෙන
පලාවෙල
රත්නපුර

අපි

ඔක්කොම යාචකයෝ
ආදරය, ප්‍රේමය
සෙනෙහස
ගරු නම්බු, ප්‍රසංශා
සිඟාකන

පරගම්මන - නන්ද
යක්විල