මිහින්තලය අපේ ඉතිහාසයේ මූලාරම්භය යි

මිහින්තලා-ලේක්හවුස් ආලෝක පූජා පින්කමේ දී රනිල් වික්‍රමසිංහ අග්‍රාමාත්‍යතුමා කියයි

පාස්කු ඉරිදා ප්‍රහාරයෙන් පසු වෙසක් සහ පොසොන් උත්සව උත්සවාකාරයෙන් පැවැත්වීමට අවශ්‍ය පසුබිම සැකසීමට තමන්ට වුවමනා වූ බවත්, ඒ අනුව අදාළ ආයතන සමඟ සාකච්ඡා කරමින් එම කටයුතු සාර්ථකව සිදු කළ බවත් අගමැති රනිල් වික්‍රමසිංහ මහතා ඉකුත් දා (16) මිහින්තලයේ දී පැවසී ය. රාජ්‍ය පාලනය සඳහා එදා ලිච්ඡවී රජ දරුවන් දුන් උපදේශවලට අනුව වත්මන් ආණ්ඩුව හා ඇමැති මණ්ඩලය ක්‍රියාකරමින් සිටින බවද වික්‍රමසිංහ මහතා එහිදී සඳහන් කළේ ය. අගමැති රනිල් වික්‍රමසිංහ මහතා එම අදහස් පළ කළේ ඓතිහාසික, මිහින්තලා පුදබිමේ විදුලි ආලෝක පූජා පින්කම විවෘත කිරීමේ අවස්ථාවට එක්වෙමිනි. මිහින්තලා රජමහා විහාරාධිපති වළවාහැංගුණවැවේ ධම්මරතන හිමියන්ගේ අනුශාසනා පරිදි ලේක්හවුස් ආයතනය වාර්ෂිකව සංවිධානය කරනු ලබන මිහින්තලා විදුලි ආලෝක පුජාව මෙවර ද ඉතා උත්සවාකාරයෙන් පැවැත්විණි. මිහින්තලා විදුලි ආලෝක පූජාවට එක්වීමට පෙර වික්‍රමසිංහ මහතා අටමස්ථානාධිපති පල්ලේගම සිරිනිවාස නා හිමිපාණන් වහන්සේ බැහැදැක ආශිර්වාද ලබා ගැනීමෙන් අනතුරුව ජය ශී‍්‍ර මහා බෝධින් වහන්සේ වන්දනා කළේ ය.