ආලෝකය

විශ්වයේ ගනඳුර
දිනිඳු ඔබ නිවාලයි
ජීවිතේ ගනඳුර
ධර්මයෙන් නිවීයයි

කිතුල්ගල
රත්නසේකර රූපසිංහ

****

කළ යුතුම දෙය

එන්නේ කොහි සිට ද යන්නේ කොයිබට ද
කියලා දන්නෙ මේ ලෝකේ කවුරුන්ද
ඉපදුණ සියලු සත මියැදෙන බව දන්න
සමහර දෙනා ජීවත් වෙති නො මැරෙන්න
මරණය උපත එක කාසියෙ දෙපැත්තකී
ඉපදුණහොතින් මරණය නිති උරුම වෙති
නෙක විගඩම් නොකර කළ යුතු එකම දෙයකී
ඉපදුම නවතමින් මරණය නැති කෙරුමයි

මාලබේ කේ. ඩබ්ලිව්. සිරිසේන

****

සසර ගමන

ගලන ගඟ දෙස
බලා සිටියෙමි
කොහෙන් ඇරැඹීද
කොතනින් කෙළවර වේද
මා නොදන්නා නමුත්
ගලායන දිය පහර
සසර ගමන ද
එසේමය
පටන් ගැන්මත්
අවසන් වීමත්
නොදනිමි
තවමත්

ලයනල් දසනායක
නියඳගල
පන්නිපිටිය

****

නිවනට මග

බණ භාවනා වැඩසටහන් අරබන්න
බුදුන් උපත ලැබූ දඹදිව වෙත යන්න
එහි ගොස් සැවොම පින්දම් රැස්කර ගන්න
නිබඳව නිවන් මඟට සිත යොමු කරවන්න

වැලිකලගේ සිරිපාල
කීරන්තිඩිය මතුගම

****

දිනුම

සුවඳින් පිරී
පිරිපුන් සුපිපි මල් ය
ලොව බැබළෙන්නේ
මේ මල් ලෙසින් සුපිපී
වසනා මිනිසුන් ය
සත් සිත් දිනා
ලොව බබළා දිනන

සමන්ත මහතන්තිල
රත්නපුර