හෑවිඕවිට ඉන්දරතන හිමියෝ නායක පදවි ලබති

මාතර දිස්ත්‍රික්කයේ, පිටබැද්දර, ගොරකවෙල ශ්‍රී ගංගාගිරි විහාරස්ථානයේ අධිපති ධූරය දරන ප්‍රවීණාචාර්ය හෑවිඕවිට ඉන්දරතන නා හිමිපාණන් වහන්සේ වසර 55 ක පමණ සිට ජාතික හා ආගමික වශයෙන් විශිෂ්ට සේවාවක නිතර වී සිටිති. විහාරස්ථාන රැසක අධිපති ධූරය දරන උන්වහන්සේගෙන් ප්‍රදේශයට සිදුවන මෙහෙවර අගයනු වස් මහා විහාර වංශික ස්‍යාමෝපාලි මහා නිකායේ මල්වතු පාර්ශවයේ අති පූජ්‍ය මහානායක තිබ්බටුවාවේ ශ්‍රී සිද්ධාර්ථ සුමංගලාභිධාන මහා නායක ස්වාමීන්ද්‍රයන් වහන්සේ ප්‍රධාන සානුනායක කාරක මහා සංඝ සභාව මඟින් ‘ධර්ම කීර්ති ශ්‍රී පඤ්ඤාතිස්ස’ ගෞරව නාමය සහිතව මාතර පළාතේ ප්‍රධාන සංඝනායක පදවිය උන්වහන්සේට පිරිනමා ඇත.

මෙම සංඝනායක පදවිය පිළිබඳ ශ්‍රී සන්නස් පත්‍ර ප්‍රදානෝත්සවය මේ මස 21 වැනි දින අපර භාග 3.00 ට මහනුවර මල්වතු මහා විහාරස්ථ රාජ පූජිත ඓතිහාසික මංගල උපෝසථාගාරයේ දී පැවැත්වෙන අතර අභිනව නා හිමියන් පිළිගැනීමේ මහෝත්සවය මේ මස 23 වැනි ඉරිදා සවස 2.00 ට පිටබැද්දර, ගොරකවෙල ශ්‍රී ගංගාගිරි විහාරස්ථානයේ දී පැවැත්වේ.

උත්සවයේ මුලසුන හොබවන්නේ ස්‍යාමෝපාලි මහා නිකායේ මල්වතු පාර්ශවයේ අනුනායක නියංගොඩ විජිතසිරි නායක ස්වාමීන්ද්‍රයාණන් වහන්සේ වන අතර ප්‍රධාන ආරාධිතයා ලෙස ශ්‍රී ලංකා පාර්ලිමේන්තුවේ ගරු කථානායක චමල් රාජපක්‍ෂ මැතිතුමා සහභාගී වේ. අභිනව නාහිමිපාණන් වහන්සේට අක්තපත්‍රය පිළිගන්වන්නේ එතුමන් විසිනි. විජිණිපත පිළිගැන්වීම සිදු කරනුයේ රාජ්‍ය පරිපාලන නියෝජ්‍ය අමාත්‍ය විජය දහනායක මැතිතුමා විසිනි. මීට අමතරව ප්‍රධාන ආරාධිත අමුත්තන් ලෙස විපක්‍ෂ නායක රනිල් වික්‍රමසිංහ, පාර්ලිමේන්තු කටයුතු පිළිබඳ ජනාධිපති ලේකම් කුමාරසිරි හෙට්ටිගේ, ආර්ථික සංවර්ධන නියෝජ්‍ය අමාත්‍ය ලක්ෂ්මන් යාපා අබේවර්ධන, කෘෂිකර්ම අමාත්‍ය මහින්ද යාපා අබේවර්ධන, දකුණු පළාත් ප්‍රධාන අමාත්‍ය ශාන් විජයලාල් මැතිතුමා ඇතුළු මැති ඇමැතිවරු මෙන්ම පළාත් සභා හා ප්‍රාදේශීය සභා මන්ත්‍රීවරු ඇතුළු සම්භාවනීය ආරාධිතයින් විශාල පිරිසක් මෙම අවස්ථාවට සහභාගී වේ.