සත් ගුණෙන් සුපසන් උතුම් දම්පල් තුමා සමරමි බැතින්

ලක් මවුන් සුදු කිත් යසස් කඳ
ඔප් නැගූ නිදහස් රසින්
සත් ගුණෙන් සුපසන් උතුම්
දම්පල් තුමා සමරමි බැතින්

උදා අරුණ’ලු නොදැක පරගැති
වහල් යදමින් බැඳී සිටි දැය
මුදා ඉන් නිදහසේ මධු රස
බෙදු සිංහල වීරයාණෙනි

එදා ඔබ අප අවදි කරනට
අභීත ව හඬ නගා කී බස
දෝංකාරය දිදී නුබ ගැබ
දෙවයි මිය යන දැයට ජීවය

අදීන ව සිය සමය මුල්කොට
නිදාසත්වය පතා දෙස රැස
නොබා මෙහෙයූ සටන චින්තන
සදානුස්මරණීය වේ ම ය

එදා මෙන් යළි ඉපැද හෙළදිව
දනන් හට පා සුනිසි මං පෙත
ඔවුන් ඇසැ දිසි ව්‍යාජ පටලය
ඉරා දුරු කළ මැනවි පිරිපත

තිරිකුණාමලේ
ආනන්ද මහ නා හිමි