UNICODE

 

[UNICODE]

මුල් පිටුව | බොදු පුවත් | කතුවැකිය | බෞද්ධ දර්ශනය | විශේෂාංග | වෙහෙර විහාර | පෙර කලාප | දායකත්ව මුදල් |

විමාන වත්ථු කථා පුවත් 04

විමාන වත්ථු කථා පුවත් 04

සතරවන පීඨ විමාන වත්ථුව

නීල මාණික්‍යමය විමානයක් ලත් පින්බර දේවතාවිය

රජගහනුවර නගරාසන්නයේ එක්තරා දිළිඳු ස්ත්‍රියක් විසුවා ය. රත්නත්‍රය කෙරෙහි ප්‍රසන්න වූ ඇය තම ශක්ති ප්‍රමාණයෙන් අවස්ථානෝචිත ලෙස දානාදී පින්දහම් කරමින් දැහැමි දිවියක් ගත කළා ය. දිනක් එක්තරා රහතන් වහන්සේ නමක් ගෙපිළිවෙළින් පිඬු පිණිස හැසිරෙමින් එම කාන්තාවගේ නිවස අභියසට වැඩම කළ සේක. මෙම දසුනින් අපමණ පී‍්‍රතියට පත් වූ ඕ තොමෝ වහාම උන්වහන්සේට ආරාධනා කළහ. ඇය විසින් නීල වස්ත්‍රයක් අතුරන ලද ආසනයක් භික්‍ෂූන් වහන්සේට ඉඳ ගැනීමට සැලැස් වූවා ය. දන් පිළියෙළ කළ ඇය එය මහත් ශ්‍රද්ධාවෙන් භික්‍ෂූන් වහන්සේට පිළිගැන්වූවා ය.

කාලයාගේ ඇවෑමෙන් කිසියම් ව්‍යාධියකට පත් වුණු ඇය මිය පරලොව ගොස් තව්තිසා දෙව්ලොව උපත ලැබුවා ය. පෙර භවයේ භික්‍ෂූන් වහන්සේ නමකට අසුනක් පිදීමේ මහඟු පිනෙන් තව්තිසා දෙව්ලොව උපත ලැබූ ඇයට නීල මාණික්‍යමය දිව්‍ය විමානයක් පහළ වූවා ය. රූප සම්පත්තියෙන් ද යස ඉසුරින් ද සිතූ පැතූ සම්පත් ලැබීමෙන් ද භාග්‍යවන්ත වූ ඇය අනෙකුත් දෙවඟනන් අතර සුවිශේෂී වූවා ය.

සුපුුරුදු ලෙස දෙව්ලොවට වැඩම කළ මුගලන් මහ රහතන් වහන්සේට මේ දෙවඟන හමු විය. තෙරුන් වහන්සේ දුටු දෙවඟන වහා විමානයෙන් බැස උන්වහන්සේට වැඳ නමස්කාර කර එකත් පස්ව සිටියදී මුගලන් මහරහතන් වහන්සේ ඇයගෙන් මෙසේ ඇසූ සේක.

“වෛධූර්ය මාණික්‍යමය විමානයක් සහ මහානුභාව සම්පන්න අසුනක් ලබා සකලඓශ්වර්යයෙන් බබළමින් දෙව්ලොව පුරා මහත් උද්දාමයෙන් චාරිකා කරන්නා වූ පින්වත් දේවතාවිය, මෙබඳු මහත් වූ සම්පත්තියක් ලැබීමට මනුෂ්‍ය ලෝකයේ දී ඔබ විසින් කවර නම් පින්කමක් කරන ලද්දෙහි ද?” දිව්‍ය සැප ලැබීමෙන් මෙන්ම එබඳු සම්පත්තියක් ලැබීමට හේතු වූ කුසල කර්මය සිහිපත් වීමෙන් ද මහත් සතුටට පත් ඇය, ඊට පිළිතුරු දුන්නේ මේ අන්දමිනි.

“ස්වාමීනි, මහ රහතන් වහන්ස, මිනිස් ලොවෙහිදී මහත් වූ කුසල කර්මයක් කරන්නට තරම් ශක්තියක් මට නොතිබිණි. එහෙත් සැදැහැ සිතින් මගේ ශක්ති ප්‍රමාණයෙන් දන් පින් කිරීමෙහි නිරත වූයෙමි. ඒ අතර එක් දිනක් පිඬු සිඟා වැඩි රහතන් වහන්සේ නමකට නිල්වන් ඇතිරිල්ලක් යොදා අසුනක් පිළිගන්වා දන් පූජා කළෙමි. මේ දිව්‍ය ඓශ්චර්යය මට පහළ වූයේ ඒ පින් මහිමයෙනි. ”සුළු වූ ද පුණ්‍ය කර්මයකින් මහත් ඵල මහානිශංස ලැබිය හැකි බව මේ කථාව උපයෝගී කර ගනිමින් තව්තිසා දෙව් ලෝ වැසියන්ට වටහා දුන් මුගලන් මහ තෙරුන් වහන්සේ, මිනිස් ලොවට පැමිණ මේ කථා පුවත බුදුරජාණන් වහන්සේට ද සැල කළහ.

මේ පුවත අර්ථොත්පත්ති කර ගනිමින් සම්මා සම්බුදුරජාණන් වහන්සේ, සිවුවනක් පිරිසට දානානිශංස දක්වා ධර්මදේශනා කළ සේක.


විමාන වත්ථු කථා පුවත් - 03 - තෘතිය පීඨ විමාන වත්ථුව - කසාවතක් අතුරා අසුනක් පිදූ පිනෙන් ස්වර්ණමය පීඨිකාවක් ලත් දෙවඟන

 

මැදින් පුර අටවක පෝය

මැදින් පුර අටවක පෝය මාර්තු මස 19 වැනි දා අඟහරුවාදා පූර්ව භාග 09.40ට ලබයි.
20 වැනි දා බදාදා අපරභාග 12.11 දක්වා පෝය පවතී.
සිල් සමාදන් වීම මාර්තු මස 19 වැනි දා අඟහරුවාදා ය.

මීළඟ පෝය
මාර්තු 26 වැනි දා අඟහරුවාදා ය.

 


පොහෝ දින දර්ශනය

First Quarterපුර අටවක

මාර්තු 19

Full Moonපසෙලාස්වක

මාර්තු 26

Second Quarterඅව අටවක

අප්‍රේල් 03

New Moonඅමාවක

අප්‍රේල් 09


2013 පෝය ලබන ගෙවෙන වේලා සහ සිල් සමාදන් විය යුතු දවස


මුල් පිටුව | බොදු පුවත් | කතුවැකිය | බෞද්ධ දර්ශනය | විශේෂාංග | වෙහෙර විහාර | පෙර කලාප | දායකත්ව මුදල් |

© 2000 - 2013 ලංකාවේ සීමාසහිත එක්සත් ප‍්‍රවෘත්ති පත්‍ර සමාගම
සියළුම හිමිකම් ඇවිරිණි.

අදහස් හා යෝජනා: [email protected]