දැනුයි මට වැටහුණේ

ජීවිතේ අඳුරු අම්බලමේ
මරණයේ ආඩපාලි හඬ අසා
තිඹිරිගේ තුළම හිඳ
වැසිකිළි වලවල් පුරවමින්
මද මාන ඊර්ෂ්‍යා
කුහකකම් එකතු කරමින්
මගේ සිත මා රැවටූ බව
දැනුයි මට වැටහුණේ

සුමිත් ප්‍රියදර්ශන

මේ වස් කාලයයි

මේ එළඹියේ අපේ
පින්බර වස්කාලේ
සැදැහැවත් උවැසියෝ
වෙති පිනෙන් පෝසත්

වපුරන්නෙ පින් බීජ
පින් කෙතේ ලහි ලහියෙ
ඒ බීජ අස්වැන්න
ඇති කෙරේ සුව තැනක්

වැ. රතනවංස හිමි
සුවිශුද්ධාරාමය
වැල්ලවත්ත

ඇබ්බැහිකම

සවන පිනන හඬ
සුවඳ විහිදූ මල
රූසිරු දසුනට
කිත් පැසසුමකට
දැඩි ආශා සිත
ඇබ්බැහිකම වෙද
එය නුසුදුසු බව
යතිවරු දෙසා ඇත
එනමුදු ඇබ්බැහිකම
හොඳමය යම් විට
පිනකට දහමට
දානෙට අත දෙන
නිවනට යොමු වෙන
ඇබ්බැහිකම නම්
හොඳමය සැම හට

අනුර ජයවීර
බදුල්ල

මවකගේ කඳුළු

දුක් කම්කටොලු වින්දත් ඒ ඔබ හින්දා
අහරක් කුසට ගත්තෙත් දරු ගැබ හින්දා
මැණික රකින නා රජු මෙන් නොව රද්දා
වැදූ මවට සැනසුම ලැබුණේය එදා

දැන් මා වාරු නැති පරඬැලක් වගේ
දරු දුක උසුලන සිත මගේ එදා වගේ
මහ පුටුවක සිටිනා සුදු පුතා මගේ
එන්න හොඳ මදියි සිටිනා තැනට මගේ

නිවහන මෙතන අසරණ මහලු අයටයි
දුක සැප දන්න මා හට එය හුරු පුරුදුයි
නෙත් ඇර මඟ බලා ඉන්නේ ඔබ එනතුරු මයි
පෙනෙනා දුරක් ආවොත් පුත පින් සිදු වෙයි

ඇ. දස්සන
ශ්‍රී බෝධිලංකාර මූලික පිරිවෙන, කතරගම.