සිරිපා වන්දනා වාරය උඳුවප් පෝදා ඇරැඹේ

සීසර් සුදුසිංහ

ශ්‍රී පාද වන්දනා වාරය උඳුවප් පුර පසළොස්වක පෝදා ආරම්භ කැරේ. ශ්‍රී පාදස්ථානාධිපති, කිරිඇල්ලේ නැදුන් රජ මහා විහාරාධිපති හදපාන්ගොඩ විමල නාහිමියන්ගේ අනුශාසනා පරිදි එහි සමාරම්භක උත්සවය පැවැත්වේ.

සිරි පා වන්දනා වාරයේ සමාරම්භක උත්සවය දෙසැම්බර් 22 වනදා අළුයම පැල්මඩුල්ලේ ගල්පොත්තාවල ශ්‍රී පාද රජ මහා විහාරයේදී පැවැත්වෙන බව ශ්‍රී පාදස්ථානයේ භාරකාර දම්පහළ සීලානන්ද නාහිමියෝ පැවැසූහ. ඊට පෙර විශේෂ ගිලන්පස බුද්ධ පූජාවක් සහ පරිත්‍රාණ ධර්ම දේශනාවක්ද ගල්පොත්තාවල ශ්‍රී පාද රජමහා විහාරයේදී දෙසැම්බර් 21 වැනිදා සිදු කැරෙන බවද උන්වහන්සේ කීහ.

ශ්‍රී පාදස්ථානය වෙත සධාතුක කරඬුව සහ සමන්දේව ප්‍රතිමාව රැගත් රිය පෙරහර 22 වනදා පෙරවරු 6.15 ට ගල්පොත්තාවල රජ මහා විහාරයෙන් ගමන් අරඹා රත්නපුර සබරගමු මහ සමන් දේවාලයේදී තේවාව පවත්වා කුරුවිට ඇහැලියගොඩ, අවිස්සාවේල්ල , කරවනැල්ල , කිතුල්ගල, ගිනිගත්හේන, හැටන් මස්කෙළිය පසුකර එදිනම රාත්‍රී නල්ලතන්නියේ ශ්‍රී පාද බෞද්ධ මධ්‍යස්ථානය වෙත ලඟා වීමට නියමිතය. එහිදී ආගමික වතාවත් සිදුකර සධාතුක කරඬුව හා සමන්දේව ප්‍රතිමාව හා පූජා භාණ්ඩ රැගත් පෙරහර සිරිපා මළුව වෙත ගමන් ආරම්භ කැරේ.

උඳුවප් පෝදා අලුයම යෙදී ඇති සුබ නැකතින් සිරිපා පද්මය හා සමන් දේවාලය සුවඳ පැනින් දෝවනය කර මෙවර සිරිපා වාරය ආරම්භ කැරේ.

මේ අතර මෙම 31 වැනිදා වාර්ෂික සර්ව රාත්‍රික පිරිත් දේශනාව ජනාධිපතිතුමාටත්, රටටත්, ත්‍රිවිධ හමුදාවටත් දැයේ ප්‍රණාමය පුද කෙරෙමින් පැවැත්වෙන බවද සීලානන්ද නාහිමියෝ පැවැසූහ.