සාධු සාධු සෑය වඳිමු

රන්වැලි සෑ වඳිමි මෙමා
සැදැහැ සිතින් සිරස නමා
මල් ඉති පිනි දියෙන් තෙමා
දෝතට ගෙන වඳිමි මෙමා

ස්වර්ණමාලී සෑය වඳිමු
දෙව්ලොව යන පාර තනමු
ඝෝර බවයට තිත තබමු
හිමි වැඩි මඟ අපිත් පතමු

අජිත් වික්‍රමනන්ද වීරසූරිය
මොරගොල්ල, ඉඹුල්ගස්දෙණිය

ජය ශ්‍රී මහ බෝධි සමිඳු

ජය ශ්‍රී මහ බෝධි සමිඳු මද සුළඟේ ලෙළ දෙන්නේ
ජය සිරිමා බෝ සමිඳුන් අප හදවත් සනසන්නේ
මහ මළුවේ ආලෝකය දස අතේම පැතිරෙන්නේ
ධු අප සැමදා සිරිමා බෝ නමදින්නේ

මහ මෙව්නා උයනේ වැඩ සිටිනා බුද්ධ ප්‍රතිමා වහන්සේ
අප සැම සිත් සැදැහැ සිතින් නිති පුබුදන්නේ
මෙත් කරුණා ගුණයෙන් සැම සිත් සනසාලන්නේ
රටට ම මුනි කරුණාවයි දසතම පැතිරී යන්නේ

බෝපත් සුළඟෙ සිළි සිළි ගා නැළවෙන්නේ
තිසා වැවෙන් එන සුළඟින් සිසිල ගෙනෙන්නේ
රුවන්වැලි සෑ රජුන්ගේ තේජස පැතිරෙන්නේ
අප සැමට ජය ශ්‍රී මහා බෝ සමිඳුගේ පිහිට ලැබෙන්නේ

ඇල්.ජේ. ආනන්දශීලී පෙරේරා

සිරස නමමි

දඹදිව දහම් සිරි සිරිලක දෙසට හමා
හෙළදිව මිහින්තලයට ශ්‍රී සිසිල තෙමා
වැඩි අප මිහිඳු මා හිමි ගුණ සිතින් දරා
දම්සුව විඳ අනුබුදු හිමි වඳිමි මෙමා

සිරිපද කඳු පෙළින් මදනළ හමන විට
අරුනලු රැස් කිරණ ගත සිත වෙළන විට
පින්බර අය පැහැද දෙසවන පිනන විට
පින් පිරි හඬ ඇසෙයි පොහො දින වෙහෙර සිට

ගිය ගිය හැම තැනම බොදු කොත් රැලි පෙනෙනා
බැලු බැලු සැම අරම සුදු බුදු රුව දිලෙනා
දුටු දුටු හැම දෙනම සිල් රෙදි හැඳ වෙසෙනා
යමු යමු ලැබ පිනම නිවනෙහි දොර හැරෙනා

බලන්ගොඩ
ආරියරත්න මාතොටගම

අනුබුදු මිහිඳු හිමි නමදිමු

මිහිඳු සමිඳු කරුණාවෙන් දෙසූ බණ
අසමින් පැහැදිලා බුදු දම වැළඳගෙන
පොසොන් දිනේ පිහිටුවමින් බුදු සසුන
දහමින් පිබිදුණා ලක් වැසියන් එදින

සිරිමා බෝධි ශාඛාවක් ගෙන පැමිණි
උඳුවප් පොහොය දින හිමියන්ගේ නැඟණී
අඳුරින් මුදා ඇතිකර සසුනත් මෙහෙණි
වනිතාවන්ට සෙත දුන් සඟමිත් තෙරණී

මියුරි වික්‍රමසිංහ
ඉහඳවත්ත, කොටදෙනියාව

සැප යැයි සිතා...

සඳකැන් වැටිලා පොහොයයි සිහිවන්නේ
පිනිදිය ඉසිරිලා අනියත බව දන්නේ
තුරු අග මල් පිපී පරවෙන බව දන්නේ
ඉපදුන කෙනෙක් නැත මරණය වළකන්නෙ

සතුටක් ඇතොත් දුකකිනි කෙළවර වන්නේ
දුක දුරු කරන්නට නැත වෙහෙසක් ගන්නේ
දහමක් ඇතත් ඇයි ඒ ගැන නොසිතන්නේ
සැප යැයි සිතා දුකමයි ළං කර ගන්නේ

ගාමිණි ජයලත් තල්දෙන