තිලොවග හිමි
තිලොවට තිලක හිමි පළමුව වස් විසුයේ
සත්ගුණ විහිදුවමින් බරණැස පුර මිගදායේ
දෙසුවා දහම් මැදි මඟකින් ලෝ සත වෙත නිසි සේ
හෙළි කළ සේක සදහම් ආලෝකය වෙසෙසේ
දෙක තුන සිව් වසර මුනිඳු වේළුවනේ වස් විසුවා
සැඩොල් දරුවො දෙදෙන සමඟ කාටත් පිළිසරණ වුණා
කෝලිත උපතිස්ස කෙලෙසුන් සිඳුමෙන් පෙරුමන් පිරුවා
මුගලන් සැරියුත් නාමෙන් සම්බුදු සසුනෙහි අගසව් වූවා
හත්වැනි වස තව්තිසාවේ දෙව් ඇරයුම පිළිගන්නේ
මෙත් බෝසත් විවරණ දී මව් දෙව් නිවනට යොමු කරවන්නේ
අට වැනි වස සුංසුමාර භේසකලා වනේ වැඩ ඉන්නේ
බෝධිරාජ පුණ්ණ කුමරුන් හට බණ දෙසමින්නේ
නව වැනි වස කොසැබෑ නුවර ඝෝෂිතාරාමේ විසුයේ
භද්දවග්ගි කළහ සඟුන් සමඟියටයි දම් දෙසුවේ
සහවැනි වස පාරිලෙය්‍ය වනේ සමිඳු ගත කෙරුවේ
උවටැන් කළ ඇතා වඳුරා දෙව්ලොව සිරි බැලුවේ
තුදුස් වසේ දෙව්රම් පුර ජේතවනේ දම් දෙසමින්නේ
පේෂකාර දූ පැනයෙන් නිවන් මඟ පහදන ගුණ අසමින්නේ
අට කරුණක් මත අනඳ තෙරුන් හට උවටැන් පදවි ලබන්නේ
නැමද ලොව්තුරු මඟ සදහම් රස බැති බරට ගොනු කරන්නේ
තුන් චේතිය අනු දැනුවා අඟුල් මල්ට සරණ වුණා
පටාචාරා - සුන්දරීට කිසාට දම් රස බෙදුනා
දෙව්රම් වෙහෙරින් පූර්වාරාමෙන් සව් ලෝ සත සෙත සැදුණා
විසිඑක් වසරේ සිට සිව් සාළිස් තෙක් සැවැතෙහි හිමි වැඩ උන්නා
අතුරුගිරියේ ධීරානන්ද හිමි |
