Print this Article


වෙසක් පොහොය වර්ණනාව

වෙසක් පොහොය වර්ණනාව

තිලොවට තිලක වූ සම්බුදු පියාහට
හදවත දෙව්රමක් විලසට පුදා සිට
තිසරණ බලය මත පිහිටා මනාකොට
දෙසවන යොමමු පොහොදින වර්ණනාවට

බුදුවරුන්ගෙන් විවරණ ලැබ පෙරදාක
පුරමින් පාරමි කප් ගණනක් නේක
ලුම්බිණි සාලවනයෙ දි අදවැනි දාක
බෝසත් කුමරුවාණෝ ඉපදුණු සේක

සුදොවුන් රජු මහාමායා දරු සැපත
වැඩ සත් පියුම් මත කළ අයුරින් සපත
වෙසඟේ පොහෝ දින නවතා භව විපත
සිදුවිය බෝසතුන් ගේ අන්තිම උපත

මවගෙන් බුදුරදුන්ගෙන් විවරණය ලද
බෝසත්තුමාණෝ පාරමි පුරන ලද
බඹසුර නරන් ගෙන් ලැබ ගෙන නොයෙක පුද
බුදුබව ලැබූ උත්තම පොහො දිනය අද

පෙන්වා දී සතට නිවනයි ගිහි විනයයි
සක්වලට ම ඇසුනේ දම් දේශනයයි
ඇරඹුන තෙරුවනයි සම්බුදු ශාසනයයි
වැදගත් පෝ දිනය වෙසඟේ පෝ දිනයයි

නිවමින් ජනී ජන සංසාරික සෝක
පන්සාළිස් වසක් වැඩ සදමින් නේක
වැඩසිට බුදුපියා වෙසඟේ පෝ දාක
දියදම අනුව පිරිනිවනට වැඩි සේක

ඉපදී ගසක් යට බුදුවී ගසක් යට
සමවත් සුවෙන් පිරිනිවී සල් රුකක් යට
මහිමිගේ බුදු සිරිත ඔප කළ නොයෙක් විට
සලකති වෙසක් පොහෝ දින බොහො උසස් කොට

ඉපැදුම බුදුවීම සහ පිරිනිවන කියා
තෙමඟුල සිදුවු දින මුල්කොට තිලොව පියා
වෙසඟ පොහෝ දින දී පින් දහම් පුරා
සමරති බොදුනුවන් උත්තම පොහොය කියා
සුන්දර වෙසක් පොහො දින සිත් පහන් කොට

පුද දී පිළිවෙතින් සම්බුදු රදුන් හට
පැතුමන් පතාගෙන සසරින් මිදෙන්නට
අදිටන් කරමු අපි නිවනින් නිවෙන්නට
වාද්දුව සමුද්‍රාරාම සිරි මිහිඳු පිරිවෙනේ

- වේලිඔය සිරිවජිර හිමි