මැදින් පොහොය වර්ණනාව

සැදැහැති උවසුවන් ලක්බිම හතර දෙසේ
බැතියෙන් දරාගෙන සම්බුදු ගුණය හිසේ
පිළිවෙත් අද දී දම් අමොද රසේ
පවසමි මැදින් පුන් පෝ දින වරුණ මෙසේ

සිදුහත් කුමරු ගෞතම බුදු පදවි ලද
කපිල වස්තු පුරයට වැඩමවන ලද
තෙවරක් යැව් ඇමතිවරු රජ අණ ද බිඳ
සසුනේ පැවිදි විය සම්බුදු පා කමල වැඳ

සුදවුන් රජතුමා සිදුවන කරුණු දැන
කාළුදායි මහ ඇමතිඳු කැඳව ගෙන
ලැබදී අවසරය ඔහුටත් මහණ වෙන
මෙහෙවර පැවරුණා බුදුහිමි වැඩමවන

රහතුන් විසිදහක් සහ නැසූ භව සෝක
සැට යොදුනක දුරක් ගෙවනට අතිරේක
බුදුහිමි මැදින් පුර පසළොස්වක දාක
කිඹුල්වතට වඩිනට ඇරඹුව සේක

බුදුහිමි පිළිගන්න දරු දැරියන් එද් දී
සැකි කුළ වැඩිහිටියෝ සැඟවෙන අතරෙහි දී
පාමින් යමා මහ පෙළහර ගුවනේ දී
බුදුහිමි නෑයන්ගේ මානය බිඳින ලදී

සුදවුන් රජ මැදුර වෙත හිමි වැඩිය තැන
මහ රජතුමා සැම සැදැහෙන් සපිළි ගෙන
දන් පිළිගන්නවා අසමින් දෙසුව බණ
සක්දාගාමී වී සසරින් එතර වින

යශෝධරාවන් වෙත හිමි වැඩම කොට
ඇගෙ ගුණ කියා නෑ පිරිවර ඉදිරි පිට
වෙසතුරු සිරිත සඳුකිඳුරුව මෙනෙහි කොට
සුවපත් කළා ඇය සසරින් එතර කොට

සුදොවුන් පිය රජුන් සසරින් එතෙර වුණා
රාහුල හා නන්ද කුමරුන් පැවිදි වුණා
යශෝධරාවන් මොක් පුර දැක සතුටු වුණා
ප්‍රජාපතී ගෝතමියන් රහත් වුණා

වාද්දුව මොල්ලිගොඩ දෙනගම්බද මහා විහාරයේ
සිරි මහ මිහිඳු පිරිවෙනේ
වේලිඔය සිරිවජිර හිමි