|
නිවීම
නොදැන කෙළවර සසර දිගු ගමනකි නොනැවතුණු
රාග ද්වේෂ මෝහ පිරී ඉතිරුණු හිත්ය හැමතැන විසිරුණු
පොදි ගැසුව කෙලෙස් කඳු දිනෙන් දින ඉහළ නැඟුණු
තාවකාලික දිවියට සැප මිස අනිත්‍ය නොවැටහේ නිරතුරු
අඳුරු කුටියක දැල්වෙනා පහනකි හුදකලාවේ
ආලෝකයෙන් දැවි දැවි නිවී යයි නිදහසේ
සොයා යාමට සැනසුම කාලයේ වැලි මං තලාවේ
නිවීමට අතහැරිය යුතු ය සැම දේ මේ භවේ
සුපසන් ව සිත නිවා නොපතා නිරතුරු මතු භවය
සැම සතට විමුක්තිය ලැබ දේ නිරාමිසය
එකම මඟක අරමුණ සිත නොවෙනස් වීමය
නොවැටහුණු නමුදු සැමට නිවන යනු නිවීමය
නිපුනි සන්ධ්‍යා රුද්‍රිගු
මාදම්පේ
****
බුදුහිමි වඳිමි
පාරමි පුරන ලද
මරු පරදවන ලද
සදහම් දෙසන ලද
බුදුහිමි ගනිමි වැඳ
අජිත් වික්‍රමනන්ද වීරසූරිය
ඉඹුල්ගස්දෙණිය
****
ගුණ දම් පුරමු
බිහිසුණු ලෙඩ දුකින් මුලු ලොව වෙළී ඇත
නිම් නැති ලෙස සිරුරු පොළොවට යටව ඇත
පෙරත් මේ වගේ දුක්ගිනි දම් සිසිලෙන් නිවී ඇත
අදත් හැම දුකට දහමින් විසඳුම් ලැබෙනු ඇත
ඊර්ෂ්‍යා ක්‍රෝධ මද මානය හදවත් තුළ රන්දා
මිනිසා නොමිනිස්ව වැජඹෙයි සදහට ඉන්නටදෝ මන්දා
අයුක්තිය අසාධාරණයට තම ගත සිත බන්දා
වැජඹෙනු බලා සොබාදහමත් විරසක විය මෙදා
ආගම් භේදයෙන් තොර කාටත් පන්සිල්වල බලය
ඒ තුළ රැඳී ඇත දයා කරුණා මෙත් ගුණය
සතා සිව්පාවා ගහකොළ වෙත නොපෑවොත් හද තුළ ඒ ගුණය
ගොනා පසුපස ඇදෙන රෝදය මෙන් පෙළයි කළ කම්වල පලය
කරුණා අමරකෝන්
වැලිගල්ල
****
දැවෙන
භව කතර
දුලබ මනු ලොව
උතුම් මව් කුස පසිඳුරන් එළිය කර
මනෝකය දවට ගෙන
ලැබ සෙනෙහෙ මා පිය
වඩා උස් මනස
දස මස නිමා කර
මනු ලොව සිරි විඳිනට
දෙදෙනකුට මා පියව
පෙර සසරේ පිනට..........
සුභ තත්පරයකින්
නිමව වේලා පත්කඩ
කර්ම රැස පොදි බැඳ
නෙත් කදුළු වගුරගෙන
වී මිනිස් සිරුරක්
බිහි වූ දා ලෙයින්
රුහිරු බිඳු කිරි රසේ
හයිය වී මුදු මොළොක් ගත
ලෙන්ගතු නමකි සුරතල්
මගෙ රන් පුත මැණික
ගලන සිතිවිලි ගඟක
ඉඳුරන් දිවෙන
සොයා දුර මාවත
විඳින්නට දහම
කුසල අකුසල...........
ළමා තුරුණු විය
දැනුම් මඟ නිමා කර
හැඩකර උතුම් සිත
දිවෙන නිසි කල
පළඳවා සළු පිළි මනා
සොයා රන් හුය
කුමර කුමරිය
දරු සෙනෙහෙ පිරිමදින
නිමා දැක මැදිවිය
ළඟා වී මහලු විය
පවට මිස පිනට නැත
බැඳී සෝදා සිත් මල
දරා සිත වැළපෙන
නියත මිහිමත
කඩා ඇද වැටෙන
සසර ගමනේ දිනෙක
සොයා යළි සසර මඟ
“ගිනිගෙන දැවෙන....”
නීතිඥ කීර්ති කපුවත්ත - රිදීගම
****
දුක දුරලමු
නැවතුණ තැන ඉඳන් හිරු හිනැහෙනවා
දුදන දනා හිරුගේ වටේ හනික දුවනවා
එළිය අඳුර පින් පව් ලෙස හඹා ඇදෙනවා
මෙතේ බුදුන් දක්නට උවැසියො පෙරුම් පුරනවා
ගෞතම හිමි දෙසූ දහම අමා
සන්දිට්ඨිකයි අකාලිකයි දනිමි මෙමා
අරි අට මඟ නොදැන යන ගමනකි පමා
දම් කඳ දැක කරගනු සසර දුක නිමා
ඒ.ටී. සෙනෙවිරත්න
පොල්ගහ අංග, තොට්ටුන්න, වැලිගල්ල
සංස්කරණය - දීපා පෙරේරා
****
කවි කිවිඳියනට සතර පෝ දාට ම දහම් තුටු පඬුරු
බුදුසරණ ‘පහන් සිතක කවි’ නිර්මාණ පිටුව සරසන ලේඛකයන් ඇගයීම පිණිස දෙහිවල නැදිමාල
බෞද්ධ සංස්කෘතික මධ්‍යස්ථානය සහ කොළඹ සම්බුද්ධත්ව ජයන්ති මන්දිරයේ අධ්‍යක්ෂ කිරම
විමලජෝති නා හිමියන්ගේ අනුග්‍රහයෙන් දහම් පඬුරු තිළිණ කෙරේ. සතර පෝදාට ම හොඳම
නිර්මාණ එවන ජයග්‍රාහකයන් සතර දෙනකුට එම තිළිණ පිරිනැමෙනු ඇත.
 |
