|
සමාධි පිළිම වහන්සේ
සහසක් කරදර දුක් පීඩා මැද
අහසක් විලසට පැතිරුණු මනු මද
අබැටක් ලෙස සුන් කර නො දමාවිද
දෙනෙතක් දකිනා සමාධි මුව තෙද
අනුරා පුරයේ වියැළුණු මඳ නළ
විසුරා දමතිය සැතපුණු සිත් මල
තවරා හද මල සිසිලක් ලෙස විල
සනරාමර බුදු නෙත් මහනෙල් මල
පැදකුණු කරනෙමි සෙල් පිළිමය වට
සිත් කුණු අතහැර යයි නො පෙනෙන්නට
වැතිරුණු කය තුළ තණ්හා පොදි කොට
ඉගිලෙනු දැනුනා බුදු රුව ළඟ මට
සෙලින් උපන් බුදු රුව හමුවේ
මෙවන් සුවය ඇති නම් මා සිතුවේ
බුදුන් ඇසින් දුටුවා නම් මෙලොවේ
කියන් ලැබෙන සුව නැත පින් කෙරුවේ
දොහොත් මුදුන් දී වැඳ අයැදින්නෙමි
සිතත් කයත් එක්තැන් කර ගන්නෙමි
සත් හට වන දුක හිමිට කියන්නෙමි
මෙත් බුදු හිමි කල උපත ලබන්නෙමි
අනුර ජයවීර,
බදුල්ල
****
මෙවර ජයග්‍රාහී කවිය
වඳිිනෙමු බුදු සමිඳේ
තුන් ලෝ සතවෙත කරුණා වීදු
මෙත් කරුණා මුදිතා ගුණ පෑදූ
ලෝ සතුනට මෙත් සිසිල ලබා දුන්
වඳිනෙමු බුදු සමිඳේ
බව දුක ඝණ අඳුරින් දුරවා ලු
සියලු සතුන් ලොව සසරින් ගොඩ ලු
අමා දම් ගඟෙන් සිසිල ලබා දුන්
නමදිමු බුදු සමිඳේ
අමා සුවය සතහට පෙන්වා ලු
අමා දමින් තුන් ලෝ සත සනසා
නිවන් මඟට මඟ පාදා දුන්
නමඳිමු බුදු සමිඳේ
ජේ.ඒ. සීලවතී,
තඹුත්තේගම
****
දුක් විඳිනා
සත මිදුණා
නෙත් ඇරුණා සිත් පිරුණා
සවන් සැනසුණා
අත් නැඟුණා මෙත් සිතිනා
දෙසූ දම් අසා
මෙත් මුදිතා සහ කරුණා
ගුණෙන් සපිරුණා
අත් මිදුණා පස්පවිනා
උවසුවන් ලෙසා
මොක් මඟිනා සැනසෙමිනා
සව් කෙලෙස් නසා
දුක් විඳිනා සත මිදුණා
සමිඳු වැඩි නිසා
කේ.පී.ජී. ඩබ්ලිව්. ප්‍රේලිස්
කිරිමැටිමුල්ල
****
මිණි මුතුවන් මනු දම්
ඉතා භයංකර වූ
සසර ඇවිදින අප
විසල් වූ මහ මෙරක් විලසට
කුසල් කර ඇත දොහොත් මුදුනින්
උතුම් පිළිවෙත නිසාවෙනි
අද මිනිස් දිවියක්
ලැබුවේ අප සැම
තිලොවග පියා
දෙසූ ධර්මය
ලැබූ මිනිසත් බවට වැඩියෙන්
මනුසත්කම රැක ගන්න අරුතින්
මොහොතින් වියැකි යන
සත්‍ය දේටම නෙත් යොමා නිති
මනුදම් දෝතින් දරා
ලෝ වැසියන්ට දායාද කර
ත්‍යාගයේ අගය වටහා
අධර්මයෙන් වැළකී
ධර්මයෙන් ජය ගනිමු
මිල මුදලට වඩා
ආර්ය ධනය හදවතෙහි තුරුළු කර
උදාර ලෙසින්
ජීවත්වන කෙටි කාලය
ගෙවමු
සත් පුරුෂයන් විලසින්
මනුදමේ නාමයෙන්
උඩයායේ පඤ්ඤාසීහ හිමි,
ශ්‍රී බෝධිරුක්ඛාරාමය, කන්දේගම,
රිදීමාලියද්ද.
****
අවසරයි බුදුපියාණෙනි
දරුකමටැයි හදාගන්න මවට බොරු කර
අරගෙන මා මැය වද දෙයි ගෙදර හිර කර
දරා සිටිනු බැරි තැන මෙහි ආමි හිරි හැර
බුදුහිමියනි ගඳකිළියට එන්න අවසර
පියා අහිමි මා රැකගත් මවගෙ ඇසුරට
සොයා යන්න ඒ රුව ගත නොහැක මත කෙට
යළිත් ගොසින් නිරාදුකෙහි වැටෙනු වෙනුවට
ම හිමි සෙවණ අසරණ මට සැපකි මිහි පිට
ලොව්තුරු බුදු පදවි ලැබූ ලොව පහන් කර
මහිමි සඳුන් නොදමනු ඇත මා අයින් කර
පැවිදිවෙලා සිටිනු දැකිය නොයමි හිමි හැර
එනමුත් මට කෝ හිමියනි සිවුරු පිරි කර
කඩිගමුවේ නන්ද
****
නිවන් දකින්නට
පෙරුම් පුරා...
මුනි සිරිපා මුල
වැඳ නමදින්නේ
බුදු දම් සඟ ගුණ
මෙනෙහි කරන්නේ
සසර ගමනෙ දුක්
නිවා තබන්නට
සමිඳුනි අපහට
සරණක් වන්නේ
සදහම් දෙසුමේ
තිලකුණු අනුවම
සිතුවිලි දහරා
ගලා ගලා යයි
පමා නොවී සැම
කුසල් වඩා
සම්‍යක් වීරිය හොඳින් වඩා
නිවන් දකින්නට පෙරුම් පුරා
ඒ.එම්. චිත්‍රසේන බටපොල මිය
පිළිමතලාව
****
සමාව අයදිමි
මල් නෙළලා විකුණුවාට
තරහා නැහැනෙ බුදු සාධු
පාසල් පොත් අරගන්නයි
පියාට පින්පෙත් දෙන්නයි
මල් විකුණන්නේ
මල් විකුණා හැන්දෑවට
ඉතිරි මලක් දෝතට ගෙන
බුදු සාධු ගෙ ළඟ තියලා
සමාව ගන්නම්
කිතුල්ගල
රත්නසේකර රූපසිංහ
සංස්කරණය - දීපා පෙරේරා
****
කවි කිවිඳියනට සතර පෝ දාට ම දහම් තුටු පඬුරු
බුදුසරණ ‘පහන් සිතක කවි’ නිර්මාණ පිටුව සරසන ලේඛකයන් ඇගයීම පිණිස ඉල් පුර පසළොස්වක
පෝදා සිට දෙහිවල නැදිමාල බෞද්ධ සංස්කෘතික මධ්‍යස්ථානය සහ කොළඹ සම්බුද්ධත්ව ජයන්ති
මන්දිරයේ අධ්‍යක්ෂ කිරම විමලජෝති නා හිමියන්ගේ අනුග්‍රහයෙන් දහම් පඬුරු තිළිණ කෙරේ.
සතර පෝදාට ම හොඳම නිර්මාණ එවන ජයග්‍රාහකයන් සතර දෙනෙකුට එම තිළිණ පිරිනැමෙනු ඇත.
 |
