කළ පින් කඳ පවුරක් වේවා

හිරු අවරට යන
සැන්ඳෑ කළුවරෙ
පහන් පැලේ පහනක් දල්වා
මුනිඳු පුදන ඔබෙ
සුපහන් දෑතට වෙර වීරිය
තව වැඩි වේවා
නිවනින් නිවෙන තුරා - ඔබ
මගේම මව වේවා

සසර පුරුද්දට පින්සර හදකට
පින් සිතුවිලි තව බෝ වේවා
දොහොත් මුදුන් දී නඟන සාදු හඬ
දෙව් බඹ තල තෙක් පැතිරේවා
නිවනින් නිවෙන තුරා - ඔබ
මගේම මව වේවා

බුදු හිමි පාමුල දැල් වූ පහන් සිල
භව අඳුරට එළියක් වේවා
නිවනේ රන්මඟ පාදා ගන්නට
සසර සයුරෙ පවුරක් වේවා
නිවනින් නිවෙන තුරා - ඔබ
මගේම මව වේවා

ආචාර්ය රත්නපාල වික්‍රමසිංහ