බෙන්තොට දෙද්දුව ගංගාරාම පුරාණ විහාරය

දක්ෂිණ ලංකාවේ ගාල්ල දිස්ත්‍රික්කයේ ගාලු කොළඹ ප්‍රධාන මාර්ගයේ බෙන්තොට කහඹිලියකන්ද සිව් මංසන්ධියෙන් වමට හැරී නැගෙනහිර දෙසට ඇල්පිටිය අලුත්ගම ප්‍රධාන මාර්ගයේ බෙන්තොට සිට කි.මී. 4 ක් ගිය විට මෙම මනරම් පින්බිම දිස් වේ. දෙද්දුව හන්දියේ සිට ඉදිරියට ටිකදුරක් ගිය විට මෙම ගංගාරාම විහාර බිමට පිවිසිය හැකි ය. සුන්දර බෙන්තර නදියෙන් ලස්සන වන මෙම පින්බිම නැගෙනහිර දිසාවෙන් සම්බුදු පහස ලද ශී‍්‍ර පාදස්ථානය ද, බෙං ගඟට ඉස්මත්තෙන් වැලිපැන්න කොට්ටාව අධිවේගී මාර්ගය ද, මතුගම පහුරු කන්ද විහාරය ද, ලෝ සුපතල ජෙප්රිභාවා වත්ත ද, මෙම අරමට මනාව දර්ශනය වේ. අවුරුදු 200 කට වඩා ඈත ඉතිහාසයක කියාපාන මෙම විහාරය බහුශ්‍රැත පඬිවරුන්, උගතුන්, ශික්ෂාකාමී හිමිවරුන්ගෙන් අලංකාර වු විහාර බිමකි. වරෙක කොළඹ මාලිගාකන්දේ විද්‍යෝදය පිරිවෙනේ අනු ශාඛාවක් ද, එම විහාරයේ පැවැති බවට ඉතිහාසය සාක්ෂි දරයි.