බුදුසරණ

සදහම් භාණ්ඩාගාරය නම දරණ
මසකට සිවුවරක් නිරතුරු එළි දකින
සම්බුදු රජුන්ගේ රුව විනිවිද පෙනෙන
මට නම් මගෙ පණයි පත සම්බුදු සරණ

මහ නා හිමිවරුන්ගේ ලිපි ඇතුළත්ය
ගිහි පඬිවරුන්ගේ අදහස් ඇත්තේය
පහන් සිතක කවි වෙනුවෙන් පිටුවක්ය

දිවි සකසා ගන්න ඔවදන් මිණි මුතුය
සම්බුදු පතේ ඉඩ ගන්නා කතු වැකිය
සාරධර්ම යළි සිහිපත් කරන්නේය
සෑම දනන්ගේ හදවත පිබිදේය
කියවිය යුතුම පත බුදු සරණම වේය

වැලිමඩ හෙවණකුඹුරේ
සුමනා කේ.එම්.

බුදුන් දකින මල් පිපුණා

ගසක් සෙවණ දුන් බව මුදු සිසිල පෙරා
ඇසක් පුරා බුදු රැස් පෙළහරක් දරා
දොසක් නොමැති ලෙස අමයුරු මියුරු පුරා
වෙසක් මල් පිපෙයි සම්බුදු ගුණ සමරා

මරු පරදවන්නට නිසි දස පෙරුම් පිපී
අරුණා ලෝකයක් ලෙස හැම නෙතම හැපී
කරුණා ගුණෙන් සපිරුණු මෙත් දියෙන් දැපී
තෙරුවන් සරණ යමු මුළු හදවතින් අපී

මැදුම් මඟ සොයා දුන් දම් ඇසක් සැදේ
රිදුම් සියලු දුක් නිවනා ලොවක් රැඳේ
මුදුන් අත් තබා වඳිනා රුවක් ඇඳේ
බුදුන් දකින මල් පිපුණා වෙසක් සඳේ

ඒ. එම්. වික්‍රමසිංහ අතපත්තු

පාරිලෙය්‍ය ඇතු

පහන් සිතක කවි අමුණමි මෙලෙස ලියා
බුදුන් උවටැනේ පිහිටී ඇතෙකු සොයා
කොසඹෑ නුවර ඇති වූ ගැටලු නිසා
බුදුන් වැඩියේ පාරිල්‍යෙ වනය සොයා

බුදුන් දුටුව ඇත් රජ තෙම ඉපිල ගියා
වැඩ හිඳිනා සල් ගස මුල දෙදණ තියා
නමස්කාර කළ ඇත් තෙම සරණ ගියා
බුදුන් ළඟට වී ඇත් රජ පින් වැඩියා

මුහුණ දොවමි පැන් සපයමි හැකි ලෙසට
සිහිල් පැන් ද උණු පැන් හෙම දුණි හිමිට
මිහිරි ඵල ද රස බොජුන් ද ගෙන වනට
පූජා කරන ඇතු යන්නේ දම් මඟට

බුදු හිමි නුවර දෙස බලමින් වැඩිය සඳ
ඇත් තෙම කඳුළු පිරි දෑසින් හැඬූ සඳ
වාවාගත නොහැකි දුක ඇතුගේ සිතක හිඳ
මිය ගිය ඇතු ගියේ තව්තිස දෙව් ලොවට එද

ආර්.එම් හර්ෂිණී කෞශල්‍යා
බණ්ඩාරවෙල

මෙලොවින් පරලොවට

මෙලෝ ජනයා
දුක් විඳින්නේ
වස්තු දේපල රැස් කරන්නයි
එක් දිනක පරලොවට යන විට
වෙන්නෙ මේ සැම අතැර යන්නයි
මක් කරන්නද සියලු නෑයොත්
යන්නෙ සුසානයට පමණයි
නික්ම යන විට මෙලොව අතහැර
යන්නෙ පව හා පිනම විතරයි

එච්. චන්ද්‍රදාස
නායකැලේ, කලගන්වත්ත