අස්ගිරිය ගෙඩිගේ විහාරය කඨින චීවර පූජෝත්සවය

මහනුවර අස්ගිරිය ආදාහන මළු ඓතිහාසික ගෙඩිගේ රාජමහා විහාරයේ (දළදා ගමන් මාලිගාව) කඨින චීවර පූජෝත්සවය මෙම මස 9, 10 දිනවල දී පැවැත් වේ.

ප්‍රදේශවාසීන්ගේ සහ ශ්‍රී ධර්මකීර්ති දහම් පාසලේ දායකත්වයෙන් පැවැත්වෙන කඨින පින්කම අස්ගිරිය මහා විහාර කාරක මහා සංඝ සභාවේ කාරක සභික පොළොන්නරුව සොළොස්මස්ථානාධිපති ශාස්ත්‍රපති වේඩරුවේ උපාලි හිමියන්ගේ මූලිකත්වයෙන් සිදු කෙරේ. 10 වැනි දින අලුයම කඨින චීවරය පේරාදෙණිය පාරේ සේරා ද සොයිසා ගුණානුස්මරණ සදාචාර කුළඟන සමිති මූලස්ථානයේ සිට වැඩම වන අතර එදින දවල් අස්ගිරි මහ නාහිමි, අනු නාහිමි ප්‍රධාන මහා සංඝ රත්නය විෂයෙහි පිරිනැමෙන සපිරිකර සංඝගත දක්ෂිණාවෙන් අනතුරුව කඨින චීවර පූජාව පැවැත් වේ.

එම අවස්ථාවට දියවඩන නිළමෙ ප්‍රදීප් නිලංග දෑල, බෞද්ධ කටයුතු නියෝජ්‍ය කොමසාරිස් කේ. ජී. මුතුබණ්ඩා යන මහත්වරු ප්‍රධාන දායක දායිකාවන් රැසක් සහභාගි වෙති.